Ezinye iziphathamandla zikahulumende labalandeli bebandla leZanu PF bacabangela ukuthi amalunga ebandla leMDC athunjwe ngoLwesithathu atholakala atshaywe kabuhulungu akhuluma amanga.
Abanye abakhuluma ngalokhu nguMnu. Energy Mutodi, umsekeli womphathintambo obona ngezokwethulwa kwemibiko, uMnu. George Charamba ozibiza ngokuthi nguJamwanda ebulenjini bokuxhumana obeTwitter, labanye abambalwa.
Bake bakwethula lokhu kuze kuthunjwe uDokotela Peter Magombeyi, owayekhokhela inhlanganiso yabodokotela ababekhalala umsebenzi.
UDokotela Magombeyi watholakala ematasatasa etshaywe kabuhlungu njalo wahlatshwa ijekiseni ngabantu abamthumbayo abacatshangelwa ukuthi badlelana lohulumende kaMongameli Emmerson Mnangagwa. Okwenziwa kuMagombeyi sokwehlele uNkosazana Joanna Mamombe, uCecilia Chimbiro loNetsai Marova, abathunjwe ngoLwesithathu betshengisela eHarare.
UMutodi uthi abantu laba abathi bayathunjwa bayazenzisa.
“Ukuthunjwa lokhu kwenziwa ngamabandla aphikisayo afuna ukuthi uhulumende akhangeleke engani ukhahlameza ilungelo likazulu njalo wephula imithetho ehlonitshwa ngamanye amazwe. Bafuna ukuthi amazwe anjenge lizwe leMelika lijezise eleZimbabwe ngokungenela ngebutho elizweni lethu hatshi izijeziso zenotho kuphela. Yikho abakufunayo abantu laba abafuna sihlaselwe ngamazwe asizondayo.”
Uthi kukhanya engani abantu bayathumbana kubandla leMDC njengoba kulokuxokozela kubandla leli.
“Awuboni ukuthi uMwonzora, uMudzuri loThokozani Khupe sebezibambile kubandla leli. UChamisa laye ulabo abantu kodwa kulokuxokozela okumangalisayo kubandla leli. Bahamba emaphandleni lapho abafika bezilimaza khona babesebehlaba umkhosi bathi bathunjwe ngabantu abadlelana lohulumende ukwenzela ukuthi uhulumende achothozwe emhlabeni wonke jikelele. Ungabahambisa kudokotela kuvela sobala ukuthi abantu laba bayaziphilela, bayabobotheka njalo bakhala kuphela bengabona ama camera. Abantu laba bayadlala nje engani ngabalingisi. Bayadlala sibili.”
Kodwa-ke abasekeli bebandla leMDC elikhokhelwa nguMnu. Nelson Chamisa bayakuphika lokhu. Omunye wabo nguMnu. Edwin Ndlovu ohlala koBulawayo.
Uthi ngamanga aluhlaza tshoko ukuthi abakubandla leMDC bayathumbana.
Asenelisanga ukukhuluma ngodaba lolu loCharamba labanye. Amapholisa athi kazi lutho ngokuthunjwa kwabathathu abalokhu besesibhedlela eHarare. Kulabantu abanengi abathunjwa ngesikhathi sombhuqazwe weGukurahundi leminye iminyaka ilizwe leZimbabwe selibuswa ngabantu abansundu. Abanye babo lokhu bengabonakali.
