Inhlanganiso ebona ngelungelo labathengi eyeConsumer Council of Zimbabwe (CCZ) ithi isikhwama esanela ukunakekela imuli elabantu abayisithupha sikhuphuke ngesilinganiso sokungaphezulu kwamatshumi amane lanhlanu ekhulwini - 45.34%.
AbeCCZ babika ukuba lokhu kungabe kubangelwe yikukhuphuka kwendleko yezinto ezinjenge Mfundo, umthelo kagetsi, ukuwa isisindo kwedola leZimbabwe nxa liqathaniswa leleMelika lokunye.
Okwamanje izisebenzi zikahulumende zihola amadola aweZimbabwe aphakathi kwenkulungwane ezine - ZW$4,000 kusiya kunkulungwane ezilitshumi - ZW$10,000 ngenyanga.
UMnu. Vusumuzi Maphosa, umsekeli kamongameli wenhlanganiso yababalisi eyeZimbabwe National Educators’ Union, uthi kufanele iholo lezisebenzi zikahulumende ledlule imali enakekela imuli yabantu abayisithupha.
“Ama figures lawa ayethulwe yiConsumer Council of Zimbabwe atshengisa ukubana ukuphila kuleli sekuqansile ngakho-ke labantu abasebenzayo sebefuna ukuthi imali yabo ingezelelwe. Sibona kulobunzima kakhulu ebantwini jikelele ngoba inengi labantu kabayitholi yonaleyo imali. Kube sekusithi izisebenzi zika hulumende ikakhulu amatitshala lawo imali yawo incane kakhulu kumele ingezelelwe ukubana yedlule kuyonale i-figure eye $20,985.”
UMnu. Nhlonipho Mqondisi Ncube, ilunga leyinye njalo inhlanganiso yababalisi eyeAmalgamated Rural Teachers Union of Zimbabwe, ulombono ofana lokaMaphosa.
“Okufakwe yiConsumer Council of Zimbabwe yinto esizibiza ngokuthi ngama basic needs abantu okumele bazithole nsuku zonke. Okutsho ukuthi inengi labantu abasebenzela uhulumende abasakwanisi ukuthenga konke khonalokhu ngoba imali yabo incane kakhulu nxa uqathanisa laleyi efakwe yiCCZ and indleko lezi zizaqhubeka zisanda ngilethemba lokhu umnyaka usiya phela kuyabe sekudabule kabili. Okunye okumele sikunanzelele yikuthi siholwa ngabantu abaqamba amanga isikhathi sonke bengakhangeli abantu ababasebenzelayo. ”
Lokhu kusekelwe ngunNkosikazi Madade Ndlovu, ophila ngokuthengisa koBulawayo, othi imali edingakalayo ukuthi imuli iphile kuyimali abangayibambiyo lapho bethengisa.
UMnu. Effort Ncube, umqondisi wenhlanganiso yamalungelo abathengi eyeNational Consumer Rights Association, uthi sokufana abasebenzayo labangasebenziyo.”
UNkosikazi Bongiwe Hove, ohlala elokitshini leNkulumane koBulawayo, uthi sebebanjwa ngamandla ukudla kabili ngelanga ukuze ukudla kwenele inyanga.
Kumaviki amabili adlulilelyo umpathintambo obona ngezemali, uMnu. Mthuli Ncube wazise ngokukhweza kweholo lezisebenzi zikahulumende ngesilinganiso sokungamatshumi amane ekhulwini - 40%, kodwa izisebenzi ziqhubeka zikhonona ukuba iholo labo aleneli ukuba baphile.
