Abantu abanengi eZimbabwe bathi umsekeli kamongameli uRetired General Constantino usehlale isikhathi eside esibhedlela kwele China ngakho kumele amiswe umsebenzi nguMongameli Emmerson Mnangagwa.
UChiwenga wathwalelwa eChina esuka esibhedlela kwele South Africa lapho ayeselatshwa khona kulandela ukugula kwakhe okungavezwanga nguhulumende. USeleminyaka phose emibili egula.
Abantu sebekhuluma okungapheliyo ngokugula kwakhe okwambamba kakhulu ngesikhathi encedisana loMnangagwa ekususeni owayengumongameli uMnu. Robert Mugabe embusweni ngomnyaka ka2017.
Omunye wabakhuluma kakhulu ngodaba lolu nguNkosazana Sethekele Nyathi odabuka eMatabeleland North.
UMaNyathi uthi kumele uChiwenga amiswe umsebenzi ngoba usebenzisa imali enengi ehlawulwa nguzulu.
Uthi uzulu kumele avimbe ukusetshenziwa kwemali ngendlela engaqedakaliyo.
Kodwa uMnu. Malaki Nkomo okubandla leZanu PF uthi abantu kumele babekezele ngoba uChiwenga kazange adinge ukuthi agule.
Umsekeli kamongameli ukhethwa ngumongameli olamandla okumxotsha umsebenzi.
UMnu. Kucaca Phulu, omelet iNkulumane edale lephalamende ekumanyano weMDC Alliance, uthi kungeke kwasetshenziswa isisekelo sombuso ukuthi uChiwenga axotshwe umsebenzi.
Kasenelisanga ukuxoxa ngodaba lolu leziphathamandla zikahulumende. Abadala bathi sizayicela isivuthiwe.
