Amalunga amabandla atshiyeneyo adinga abantu abazabavotela emadolobheni lemaphandleni kukhetho oluzakwenziwa ngomnyaka ka2023 kulandela imibiko eyethulwe yikhomishini yeZimbabwe Electoral Commission ethi balutshwana ababhalisela ukuvota kukhetho lolu. Ibandla leMDC Alliance liqhuba uhlelo lokudinga abantu abafika izigidi eziyisithupha – 6 million kuthi eleZanu PF lidinga abantu abazalivotela abayizigidi ezinhlanu – 5 million.
Amanye amabandla agoqela eleEconomic Freedom Fighters Zimbabwe, Zapu, Mthwakazi Republic Party, MDC-T lamanye, lawo asedinga abantu abazavota kukhetho lolu.
Amabandla wonke akhangelelwe ukuba azakuma kancane ukwenza imihlangano yokukhanga abantu ukuba bavote kukhetho lolu kulandela ukwethulwa kweziqondiso ezintsha nguhulumende ezokuzama ukuvimba ukumemetheka kwegciwane leCOVID-19 eZimbabwe. Amabandla amanengi abesenza imihlangano etshiyeneyo lozulu.
UDokotela Nkululeko Sibanda, isikhulumeli sikamongameli weMDC Alliance, uthi luqhubeka kahle uhlelo lwabo lokudinga abazavota ngomnyaka ka2023.
USibanda uthi luqakathekile kakhulu ukhetho olulandelayo.
UMnu. Believe Gaule, okubandla leZanu PF, uthi bazasebenza loba kulohlelo lweCOVID-19 lockdown eZimbabwe.
UGaule uthi bafuna ukuthola abantu abedlula izigidi ezinhlanu abazavota.
UMnu. Khaliphani Pugeni, okubandla leMDC-T okhankasa loNkosazana Thokozani Khupe, uthi bazaqhubekela phambili bedinga abantu bokuvota kukhetho oluzayo.
Ikhomishini yeZimbabwe Electoral Commission ithi kulabantu abalutshwane kakhulu ababhalisela ukuvota ngakho-ke ezinye indawo – ama-constituencies engamanyaniswa nxa kungatholakalanga abavotayo abafika inkulungwane ezingamatshumi amathathu – 30,000.
