Inkokheli yenhlanganiso ezizimeleyo, eyamabandla ezombusazwe aphikisayo kanye lozulu bathi sokunciphe amathuba okuzibusa eZimbabwe ngesikhathi kumemetheka umkhuhlane weCOVID-19.
Bathi kuyamangalisa ukuba uhulumende wehluleka ukuqhuba ukhetho lwama by-elections kulandela ukususwa kudale lephalamende lamakhansili kwabalandeli bebandla leMDC Alliance yilabo abakubandla leMDC-T elikhokhelwa nguMnu. Douglas Mwonzora.
Asebexotshiswe kudale lephalamende lakumakhunsili njalo lababulawa yimikhuhlane etshiyeneyo, bafika phose ikhulu – 90 elizweni lonke.
Ukukhonona kwabantu lokhu kuza kusanda kuthakazelelwa usuku lokuba uzulu azibuse emhlabeni wonke jikelele olweInternational Day of Democracy.
Inhlanganiso eyeUnited Nations leye Zimbabwe Election Support Network zithi amanye amazwe asesebenzisa umkhuhlane weCOVID-19 ukuncidezela uzulu.
Ukuze sihlaziye udaba lolu, sixoxe loMnu. Felix Magalela Mafa, umsekeli wesikhulumeli sebandla leMDC Alliance, loMnu. Joseph Tshuma, okubandla leZanu PF. UMafa uthi ibandla leZanu PF lincendezela abantu ngoba lifuna ukubusa kokuphela.
Kodwa-ke uTshuma uthi akuqondakali okukhulunywa ngamanye amabandla atshiyeneyo afuna ukuba kuqhutshwe ukhetho loba limemetheka ngamandla igciwane leCOVID-19.
Uthi balakho ukunqoba kukhetho lwama by-elections njengenhlalayenza.
