Amabandla ezombusazwe kwele Zimbabwe athi azimisele ukuncintisa kukhetho lwama by-elections kwele Zimbabwe olukhangelele ukwenziwa kunyanga ezimbili ezilandelayo ngemva kokuba uMongameli Emmerson Mnangagwa azise namuhla usuku lokuba lwenziwe.
UMongameli Emmerson Mnangagwa usebenzisa umthetho oweStatutory Instrument 2 of 2022, ukwazisa ukuba umhlaka 26 Mbimbitho, 2022, kulapho okuzaqhutshwa ukhetho lwama by-elections lokudinga amalunga edale lephalamende.
Izikhundla zedale lephalamende zavuleka ngemva kokuxotshwa lokubhubha kwamanye amalunga edale lephalamende.
Inengi lezihlalo ezivulekileyo yilezo ezazingabebandla leMDC Alliance ephalamende laku makhansili abaxotshwa yiMDC T, ekhokhelwa nguMnu. Douglas Mwonzora. Ibandla leli laphiwa imvumo yokwenza njalo ngumthethwandaba waphezulu oweSupreme Court ngomnyaka ka2020.
Amabandla ezombusazwe emukele ngenjabulo lumbiko wokhetho.
UMnu Felix Mafa, umsekeli wesikhulumeli seMDC Alliance. uthi ibandla lakhe lizaveza ukuba yilo elithandwa ngabantu.
“Thina abeMDC Alliance sizimisele ukuthi kube lokhetho. Sasibatshela ukuba kumele abekhona. Thina akusethusi sizimisele, sifuna ukubatshengisa ukuba into abakade beyenza ayisoze ibancedise.”
Abebandla leMDC-T, ekhokhelwa nguMwonzora, labo bathi bayathokoza ngokubekwa kosuku lokhetho lolu.
UMnu. Witness Dube, isikhulumeli sebandla leli, uthi loba kunjalo bazaphanyeka udaba lwe-voters roll emthethwandaba.
Ibandle leZanu PF lithi lizanqoba kulolu khetho ngoba lisebenze kakhulu kuminyaka emine selokhe kwaqhutshwa ukhetho. Lokhu kuchasiswe nguMnu. Munashe Mtutsa, omele abatsha kubandla leli ko Bulawayo.
“I-ZANU PF libandla labantu. Isitshengisele endaweni zayo lapho ebe ilabameli silethemba lokuba sizanqoba ngoba abantu sebebonile imisebenzi enziwe ngu hulumende ka Mongameli Mnangagwa.”
Embikweni munye wokwazisa ngelanga lokhetho, uMnangagwa uphinde wazisa njalo wabeka ilanga lika mhlaka 26 Zibandlela ukuba ngelokubhalisa kwabafuna ukuncintisa kulolokhetho edale leNomination Court.
Lolu khetho olwalumele lwenziwe ngomnyaka ka2020 lwadluliselwa phambili uhulumende esithi usaphatheke ngomsebenzi wokumelana lobhubhane lweCovid 19.
Ingcwethi ezicubungula ezombusazwe zithi ukhetho lwama by-elections lolu alusoze lwanceda kangako ukuguqula umumo oselizweni okwamanje, kodwa impumela yalo izatshengisa isimo sosekelo lwamabandla ezombusazwe elizweni lapho elungiselela ukhetho olukhulu lwelizwe luka2023.