Abancintisa kukhetho lokudinga ozamela iLupane East edale lephalamende olwenziwa ngoMgqibelo bathi luqhubeke ngemfanelo lobanje kukhanya kulabantu abalutshwana abavote kukhetho lolu.
Amabandla ancintisayo agoqela eleMDC elikhokhelwa nguMnu. Nelson Chamisa, eleZapu, iZanu PF lamanye, athi abantu bavote ngokuthula kukhetho lolu olwenziwa kulandela ukubhubha kuka Nkosikazi Sithembile Gumbo owayemele indawo le ekubandla elibusayo.
Labenhlanganiso ezimele yodwa eyeZimbabwe Election Support Network bayakusekela lokhu loba bekhala ngokuthi kukhanya bebalutshwana abantu abavotileyo.
Umsekeli womgcinisihlalo wenhlanganiso le uMnu. Dumisani Nkomo uthi balabantu abanengi abahlolisisa ukhetho lolu.
Ilunga lebandla leMDC, uMnu. Prince Dubeko Sibanda, uthi balutshwana abantu abavotileyo.
Ibandla lakhe likhangelele ukuthi uMnu. Dalumuzi Khumalo uzanqoba kukhetho lolu.
Kodwa uMnu. Believe Gaule webandla leZanu PF uthi ibandla leli lizanqoba kukhetho lolu.
UGaule uthi ibandla leMDC likhohlwe ngokunqoba endaweni le.
Amanye amabandla agoqela eleMthwakazi Republic Party lawo akhangelele ukuthi azanqoba. UMnu. Bhekinhlalo Ndlovu webandla leli uthi abantu bayabasekela okumangalisayo.
Kalandaba lokuthi manengi amabandla aphikisayo ancintisana lele Zanu PF kukhetho lolu.
Isikhulumeli sebandla leZapu ezansi yelizwe, uMnu. Patrick Ndlovu laye uthi bazanqoba.
Uthi okungahlupha yikuthi amabandla aphikisayo kawamanyananga kukhetho lolu
Kasenelisanga ukukhuluma lekhomishini yeZimbabwe Electoral Commission eqhuba ukhetho lolu olugqitshwa kusihlwa namuhla. Kukhangelelwe ukuthi amavoti azabalwa ngesiphangiphangi impumela yethulelwe uzulu ngeSonto ekuseni.
