Izizalwane zeZimbabwe esezihlala kwele Bhilithane zilokukhathazeka lokwesaba ngokuzakwenzakala elizweni lelo lingaxexebuka kumanyano wezwekazi leEurope owe European Union okukhangelelwe ukwenzakala ekupheleni kukaMfumfu lonyaka.
Inengi lithi lilokwesaba ukuthi kuzaba lobandlulo olukhulu lobudlwangudlwangu, njalo ukutholakala kwengwalo zokusebenza kumbe ukwethekelela lokuhlala eBhilithane kuzabanzima, ilizwe lelo lingaphuma kumanyano weEuropean Union.
UKansila weSandwell eBirmingham, uMnu Thabiso Mabhena omela ibandla eliphikisayo kwele Bhilithane eleLabour Party, uthi ibandla elibusayo elama Conservatives kalizifuni izizalwane zakwamanye amazwe kwele Bhilithane yikho nje befuna iBrexit.
UMnu. Fortune Sibanda, ohlala edolobheni leWolverhampton olilunga lebandla elibusayo elamaConservatives, uthi iBrexit ayilani lezizalwane zeZimbabwe ezihlala kwele Bhilithane.
"Kulehungahunga engilizwayo mayelana lama Zimbabweans ukuthi kungaba leBrexit bazabe sebethwele nzima. Ngombono wami kungamanga lokhu …”
Ukhansila Mabhena uthi indab’ekhona ngeyemithetho ezabunjwa ngemva kweBrexit acabanga ukuthi ingahlukumeza abeZimbabwe abahlala eUK.
Banengi kulez’insuku abalala bengalele bengazi ukuthi inyanga le iphela kuzathiwani ngabo ngoba bephethe ingwalo zokusebenza kuleli.
UNkosazana Maureen Mhlanga ngomunye wabo. "IBrexit isenza thina abanye sihlalele evalweni ngoba uPrime Minister okhona uJohnson kathenjwa. IUnited Kingdom ingaphuma eEurope balakho ukutshintsha imithetho basixotshe thina amaZimbabwe esilapha ngama work permits njalo kulezinsuku amanye amakhiwa seqalisile ukubandlula abantu abamnyama besithethisa besithi sibuyele kithi. Iqiniso mina iBrexit ngiyayesaba."
USibanda kavumelani loMaMhlanga esithi umkhokheli weBhilithane uJohnson ngumuntu amaziyo, othembekileyo ayake axoxe laye njalo ngeke axotshe izizalwane zeZimbabwe ezihlala eNgilandi.
"UBoris Johnson ngumuntu esengike ngahlangana laye ngaxoxa laye. Ngokubona kwami yindoda eqotho ngemva kokuxoxa laye. Angiboni ukuthi angafuna ukuthi athwalise nzima abantu abadaduka eZimbabwe …”
Igqwetha njalo eliyingcwethi kwezemithetho yokungena kwabantu elizweni, uImmigration lawyer, uNkosazana Sihle Dube oweKM Solicitors edolobheni leManchester, uthi iBrexit ingaba luhlupho kuzizalwane zeZimbabwe ezithanda ukwethekelela kwamanye amazwe aseEurope.
“Inkulumo ziyaphambili phakathi kwele Bhilithane lomanyano weEuropean Union ukuthi behlukane kahle basale belokhu belobudlelwano obuhle kwezomnotho …”
