Ikhansili yakoBulawayo imanyane labe nhlanganiso eyeDanish Church Aid lenkampani yeCocaCola Africa Foundation ekupheni isipho senkulungwane ezingamatshumi amahlanu zamadola eMelika - US$50,000 yokwemba izibholane eziyisithupha, edolobheni leli emizameni yokuqeda udubo lwamanzi.
Ekhuluma eMakhandeni emkhosini wokusungula okusemthethweni umsebenzi wokwemba izibholane lezi, umqondisi wenkampni yamanamineda eyeCoca Cola Zimbabwe, uMnu. Milidzani Ncube, uthe izibholane lezi zizasebenza ngamandla elanga awesolar.
Umsekeli kameya, uMnu. Mlandu Ncube, ubonge abelule izandla benceda ngemali kulol'uhlelo.
Obona ngokuqhutshwa kwenhlelo kunhlanganiso yeDanish Church Aid, uMnu. Paul Moyo, uthe bakubone kufanele ukuthi baphathise ukulungisisa udubo lwamanzi koBulawayo.
Isakhamuzi seMakhandeni, uNkosikazi Marria Sibanda, uthi uswele amaphiko ngokujabulela isibholane.
UBulawayo minyaka yonke ubhekana lodubo lwamanzi. Lokhu ziqhubeka zisanda inhlanganiso ezizimeleyo, esezibona kufanele ukuthi zincedisane lomanisiphala wakoBulawayo ukucongolozela amanzi endaweni ezitshiyeneyo.
Uhulumende laye ngoLwesine ngeviki ephelileyo uvule okusemthethweni ezinye zezibholane ezitholisa uBulawayo amanzi eNyamandlovu, emkhosini okhokhelwe nguMongameli Emmerson Mnangagwa.