Kulabanye abantu abadabuka kwele Zimbabwe abathi bazavala ngci eBeitbridge leMesina ngoLwesihlanu uMongameli Emmerson Mnangagwa aze asuke esikhundleni.
Bathi uhulumende kaMnangagwa wephula amalungelo kazulu njalo wenza ubukhohlakali obumangalisayo.
Omunye wabakhokhela umkhankaso lo, uMnu. Sifiso Khulumani, uthi kulabantu abanengi abathi bazavimba eMesina ukwenzela ukuthi izimota ezithwala impahla ezivela kwele South Africa leZimbabwe zingedluli kuleyonda.
UKhulumani uthi baqhuba umkhankaso lo ngaphansi kwesihloko esithi #ZimbabweLivesMatter, esasungulwa nguMnu. Julius Malema, okhekhela ibandla leEconomic Freedom Fighters kwele South Africa.
UMalema, okhala ngokwenzakala eZimbabwe, kakakhulumi lutho ngodaba lolu. Akwaziwa ukuthi ibandla lakhe lizangena kumbe hatshi kumkhankaso lo. Ukuze sizwe okugcweleyo ngokuzakwenzakala emngceleni welizwe lowakwele South Africa, sixoxe loKhulumani.
Kodwa abalandeli bebandla leZanu PF abanjengo Mnu. Believe Gaule, bathi abantu laba bahlokoza indlu kalonyovu.
Okwamanje uhulumende kaMongameli Cyril Ramaphosa usanda kuthumela abantu bakhe kwele Zimbabwe kodwa kukhanya akulalutho abaphenduka belubambile ngenxa yokuthi bakhulumisana kuphela loMnangagwa.
Inhlanganiso ezitshiyeneyo zithi kulabantu abanengi ababotshwa eZimbabwe okuthiwa bafuna ukugenqula uhulumende kaMnangagwa okungekho emthethweni.
Abakhokhela ukholo lwama Roma kwele Zimbabwe basanda kuchothoza uMnangagwa ngokwenzakala elizweni.
Kodwa ezinye iziphathamandla zikahulumende zithi akulankinga eZimbabwe.
