Kudaba lweziphathelane lesimo sezombusazwe eZimbabwe esilethulela lona nsukuzonke, ngoLwesibili sixoxe loNkosikazi Beauty Nyambosi Kerr ongumsekeli kaMnumzana Elton Mangoma, umkhokheli webandla leRenewal Democrats of Zimbabwe.
UNkosikazi Kerr uthi ibandla lakhe liyakubona ukuthi uzulu uyahlupheka elizweni lapho okudingakala khona ukuthi kuguqulwe ezombusazwe ukuze lomnotho uthuthuke.
UNkosikazi Kerr uthe, “Abantwabethu okwamanje kabasebenzi badabula umhlabathi ngamapiki. Bayafa befela emgodini. Kunengi okwenzakalayo kukanti-ke kwenziwa ngabantu abalolunya.
“Abanye babuya bethwele amafulawuzi ezifubeni bevela eSouth Africa … kubuhlungu kakhulu lokhu. Khathesi nxa ngikhangela khonapha koBulawayo abafana abahle, amajaha athetheyo athwele amabhokisi emakhanda athengisa amabanana abolileyo.”
Uthe labesizafane batshona bethengisa impahla atshiyeneyo bexotshaniswa ngamapholisa loba nje bezama ukuphandela immuli zabo impilo.
Ephendula umbuzo wokuthi kumele kwenziweni ukuze umnotho welizwe uthuthuke, uNkosikazi Kerr uthi ibandla lakhe lilakho ukusebenzelana lamanye amabandla alembono efanayo ukwenzela ukuthi kulungiswe okunengi okuhluphayo elizweni.
Uthe kumele kulungiswe ezombusazwe kungakaguqulwa umnotho welizwe.
Ukuze lizwe okunengi ngodaba lolu hambani kubulembu beInternet ku – www.voandebele.com. Sizaphinda njalo www.voandebele.com.
Kudaba olufanayo ngoLwesithathu sizabe sixoxa loMnu. Rugare Gumbo omunye walabo asebekuzinga eliphezulu lokubumba ibandla lePeople First elilakho ukukhokhelwa nguNkosikazi Joice Mujuru owaxotshwa kubandla leZanu PF.