Abantu abanengi bathi balethemba lokuthi izifiso zabo zomnyaka omutsha ka2020 zizafezeka kukanti lalokho abafisa ukukwenza kuzaphumelela lanxa isimo somnotho elizweni singamanga kuhle.
Lanxa bedonsa nzima abantu empilweni, abanye bathi ukukhala akusizi, okuqakathekileyo yikuphuma lamacebo okuphila phakathi kobunzima bonalobo bebonga uMdali ngesipho sempilo.
UDokotela Terry Ngulube uthi ukhangelele ukusiza uzulu odubekayo lonyaka.
"Eyami ngeyokuthi ngikwanise ukuthi ngiphakamise abanye abantu abangenelisiyo empilweni ukuba lezinto ehhh ukuthi ngibhadalele abantwana ischool fees abangakwanisi, abazintandane abangakwanisi ukuthi bayenelise ukuthi babhadale ischool fees lokuthi baye baphakamise impilo zabo.”
Inengi kalinaki ngodubo lwemali, lisebenza lisiyaphambili njalo bathi abantu abakhangele okuhle abangakwenza ngempilo zabo. UNkosazana Francine Thomas ngomunye wabo.
"Kumele sihlale sipositive kuyo yonke into esiyenzayo.”
UMnu. Hudson Simbarashe, umculi olodumo koBulawayo, ukhangelele impumelelo enkulu kulumnyaka.
"Ngiyathaba kakhulu lami ngingenile ku2020 kodwa futhi njalo umnyaka lo ka2020 ngikhangelele ukuthi khona hayi, imusic yangakithi izaqhela sibengama household names the world over. Idlalade engilisebenza eStudio, eight songs kade simelele nje ukuthi sifike emaphethelweni ka2019 but soonest iyabe sikhona."
Kukhona abathi umnyaka ophelileyo ka2019 wawungamubi kakhulu kubo ngoba kukhona okwabajabulisayo lenzunzo abayitholayo njalo.
"Mina igama lami nginguDingani Mpofu uNyandeni insizwa yezinsizwa. Yebo u2019 ungihambele kahle kancane ups and down but wat I'm glad of ngitholi some award eRainbow Hotel as the best barista in Zimbabwe lokho lami kungijabulisile but ku2020 into engiyikhangeleleyo yikuthi nami ngithole umuntu wami ngibe nomfazi ngibe neCoffee Shop yami nami ngenzi ibhizimusi ngibe neskolo sokuthi futhi ngifundis'abantu ukwenza ama cuppacino ama latte ama design".
Umbalisi uNkosazana Beverley Mpofu uthi iholo lakhe lincane kakhulu njalo yena lonyaka uyatshiya umsebenzi ayedinga amadlelo aluhlaza.
"Isifiso sami sika 2020 ngesokuthi ngitshiye umsebenzi wobubalisi kwelakithi,ngibhalele kwamanye amazwe anjengabo South Africa, Namibia ngidinge umsebenzi lapho okulemali engani ingcono khona, engani isathenga khona, kumbe ukuqala ibhizimusi lokuthengisa izinto zonalezi esisetshenziswa ngabantu nsukuzonke ezinjengabo sepa, mafutha."
Amaphupho okuphumelela akhona kodwa amanye azahlala engamaphupho nje nxa isimo somnotho singaguqukanga saba lobubelo. Bathi akulankwali eyaqhwandela enye, kunjalo lakuzulu weZimbabwe, lo lalowo uyazibonela.
