Intathelizindaba kwele Zimbabwe zithi kaziboni ukuthi kuzabunjwa umthetho omutsha okhuthaza ukukhululeka kwezokwethulwa kwemibiko lezindaba kulandela ukwesulwa komthetho wokuphawulwa kwezindaba oweAccess to Information and Protection of Privacy Act okufiswa nguhulumende kaMongameli Emmerson Mnangagwa.
Intathelizindaba ezimbalwa ezixoxe lomsakazo weStudio 7 zithi uhulumende kaMnangagwa ulakho ukubumba imithetho ezavimba ukwethulwa kwezindaba nguzulu ebulenjini bokuxhumana obugoqela obeFacebook, iTwitter lokunye okufanayo.
Uhulumende, okewavimba ubulembu bokuxhumana ngesikhathi uzulu etshengisela emigwaqweni ngoZibandlela, usanda kubika ukuthi uzimisele ukwesula umthetho weAIPPA owenza kubenzima ukuthi kwethulwe imibiko ikakhulu ehambelana lokwenziwa nguhulumende.
UMnu. Njabulo Ncube, okunhlanganiso ekhankasela ukukhululeka kwamaphephandaba lemisakazo eyeVoluntary Media Council of Zimbabwe, uthi uhulumende kaMnangagwa ulakho ukubumba umthetho ozancindezela uzulu kanye lentathelizindaba.
“Silokwesaba okokuthi omunye waleyo imithetho abafuna ukuthi bayifake kungabe kukhangelelwe khonalokho ukuthi yeluse ukusetshenziswa kwe social media.”
Kodwa-ke uMnu. Joseph Tshuma, okudale leCentral Committee kubandla leZanu PF, uthi uNcube labanye bakhe besaba umnyama ongelampisi.
“Nxa usenza into epheleleyo engalakuganga phakathi akulanto okumele uyesabe.”
Uphinde wathi kumele kujeziswe abantu abethula inhlamba lamanga ebulenjini bokuxhumana.
