Uyamemetheka umkhuhlawe weCOVID-19 eZimbabwe okulabantu abafika phose inkulungwane lengxenye - 1,478 asebehlolwe batholakala belomkhuhlane lo osubulele abangamatshumi amabili lanhlanu – 25 elizweni.
Abantu abendlula amakhulu amane – 447 abalomkhuhlane lo bahlala koBulawayo.
Uhulumende uthi ulakho ukuqinisa iziqondiso zohlelo lokuvalela abantu ezindlini esenzela ukuvimba ukumemetheka kwegciwane leCOVID-19.
Abanye abantu bayakuthakazelela lokhu kubelabanye njalo abakusolayo besithi uhulumende ulakho ukwephula amalungelo kazulu kungenziwa uhlelo lolu.
Ugogo uMaSibanda, ohlala eGokwe, ngomunye wabasekela ukuqiniswa kweziqondiso zohlelo lweLockdown.
Lokhu kusekelwa nguMnu. Mcijo Mkhwananzi othi kumele abantu balandele iziqondiso zohlelo lolu.
UMnu. Kesdom Mbedzi ulombono ofanayo esithi kumele kuvinjwe emngceleni wakwele South Africa leZimbabwe okulabantu abanengi abangena okungekho emthethweni.
Banengi abaphikisa ukuqiniswa kweziqondiso zohlelo lweLockdown. Omunye wabo ngoMnu. Prince Sibanda.
UMNU. Nkosikhona Khuphe laye uyakusola lokhu.
UMnu. Simayedwa Ndlovu uthi kumele uhulumende adinge umuthi wokwelapha umkhuhlane lo hatshi ukuvalela abantu ezindlini okungapheliyo.
Lokhu kusekelwa nguMnu. Eric Tshabalala othi kumele abantu badinge indlela ezitshiyeneyo zokuphila ngesikhathi somkhuhlane weCOVID-19.
USikhwicamfundo Solwayo Ngwenya, okhokhela inhlelo ezitshiyeneyo eMpilo Hospital, uthi kuqakathekile ukuba abantu balandele iziqondiso zohlelo lokuvalela uzulu ezindlini.
Isibhedlela seJohns Hopkins University sibika ukuthi emhlabeni wonke jikelele, kulabantu abedlula izigidi ezilitshumi lane – 14,311,886 abahlolwa batholakala belomkhuhlane weCOVID-19.
Sokubhubhe abedlula inkulungwane ezingamakhulu ayisithupha – 602,757. Kwele Melika, kulabantu abafika phose izigidi ezine – 3,9 million asebetholakale belomkhuhlane weCOVID-19. Sokubhubhe abedlula phose inkulungwane ezilikhulu lamatshumi amane – 140,120.
