Inhlanganiso elwela ilungelo likazulu eyeAmnesty International ithi isimise umsebenzi abaqondisi benhlanganiso le eZimbabwe esiphethwe okwamanje yilabo abazakhangelana lezikwelede zayo lokunye okutshiyeneyo.
Inhlanganiso le yethule umbiko lo ngoLwesine isithi yenze lokhu ngenxa yokungethembeki kwenkokheli okukhanya ukuthi kayisebenzisanga ngemfanelo imali.
Ithi inhlolisiso eyenziwe kusukela ngomnyaka ophelileyo iveze ukuthi ezinye izisebenzi bezitshontsha imali okumangalisayo. Ithi isimangale udaba lolu emapholiseni ngakho-ke kayisoze ikhulume okunengi ngokwenzakala eZimbabwe.
Inhlanganiso le igcizelele isithi isizama ukudinga eyinye imali yayo ebantwini abacatshangelwa ukuthi batshontsha imali yayo.
Kodwa-ke uMnu. Cousin Zilala, owayengumqondisi weAmnesty International kwele Zimbabwe, uthi wabanjwa ngamandla ukuthi asuke esikhundleni sakhe nyakenye.
Uthi kazange anikwe ithuba lokuthi anike ubufakazi bokuthi basebenzisa njani imali okuthiwa kayisetshenziswanga ngemfanelo.
UZilala uthi kungamanga ukuthi watshontsha imali labanye bakhe abagoqela uMnu. Takesure Musiyiwa loNkosikazi Sibongile Zimbeva.
Abathathu laba sebefuna ukuthi bahlawulwe izigidi ezintathu zamadola - $3 million yokuqanjelwa amanga yinhlanganiso le.
Kasenelisanga ukukhuluma lamapholisa ngodaba lolu.
UMnu. Robert Shivambu, umqondisi wokukhitshwa kwemibiko kuhlanganiso yeAmnesty International ezansi yezwekazi leAfrica, walile ukukhuluma ngalokhu okwethulwe nguZilala lokwenzakala ewofisini yabo eHarare.
