Umqeqetshi omutsha weqembu lomdlalo wenguqu ele Highlanders uAmini Soma Phiri uthi yena leliqembu lizanqoba emidlalweni elisele layo kusigaba se PSL ngaphansi kwenkokheli yakhe.
Ekhuluma lentathelizindaba zemidlalo okwakuqala selokhu ephiwe umsebenzi wokuba ngumqeqetshi weqembu le Highlanders uAmini Soma - Phiri uthe uzaphumelela emsebenzini wakhe ngoba engasuye muntu omutsha kuqembu le Highlanders ikanti lomsebenzi wokuqeqetsha uselesikhathi eside ewenza.
Lumqeqetshi usebenza encedisana lo Melusi Mabaleka Sibanda onguye umsekeli wakhe ikanti u Cosmas Zulu nguye ophethe isikhundla sokucebisa abaqeqetshi.
Iqembu le Highlanders lizadlala leqembu le Harare City esigodlweni ngoMgqibelo njalo uSoma uthe bakhangelele ukuba bahle banqobe kuwo lumdlalo baphinde banqobe njalo lakweminye eyithoba minwe mbili ezalandela lapho.
Iqembu le Highlanders lihlezi kundawo yetshumi engalalaneni yemiklomelo njalo uSoma uthi lesisimo yiso azosilungisisa loba nje engasaphumelanga egcekeni ekutheni ukhangelele ukuba isizini ithi ifika emaphethelweni iqembu le Highlanders lihlezi ngaphi kwendawo engalaneni.
Iqembu le Highlanders lizabe lingela badlali abathathu abayingxenye yeqembu elimela ilizwe emncintiswaneni we African Games eqhutshelwa eCongo Brazzaville ikanti iqembu le Harare City lalo lilabadlali ababili abakulelo qembu lama Young Warriors.
Kusenjalo iqembu lamajaha aleminyaka engaphansi kwamatshumi amabili lambili elimela ilizwe emdlalweni wenguqu kumncintiswano we African Games linqotshwe nge 1 ka nya ngele Sudan emdlaweni wesibaya sika Group B.
Limpumela itsho ukuba leliqembu lijeke amanye engalaneni yemiklomelo lingela ngitsho lowodwa njalo aliselalo ithuba lokudlulela kusigaba esilandelayo.
Kolunye udaba olumayelana lomdlalo wenguqu uhlelo lokuba amaqembu azadlala njani kusigaba se quarter - final eyenkezo ye Chibuku Super Cup lwenziwe namhla edolobheni le Gweru njalo amaqembu azadlala ngokulandelayo.
Iqembu le Triangle lizadlala lele Harare City, iqembu le ZPC Kariba lizadibana lele How Mine, iqembu le Chicken Inn lizadlephana leqembu le Chapungu kuthi ele FC Platinum lizangqikilana lele Dynamos.