AbeZimbabwe abahlala kwele Botswana bakhala ngokuthi ayancipha amathuba abo awokuthi bayefika ekhaya ngekhefu leKhisimusi ngemva kokuba umongameli Emmerson Mnangagwa eqinise iziqondiso zokwenqabela ukumemetheka kweCOVID-19.
Amathemba awakhefu lekhisimusi elimnandi aqhubeka etshabalala kwabeZimbabwe abahlala eBotswana, inengi lisele libambe owangaphansi ngemva kokuba uMongameli Mnangagwa ekhiphe uluhlu lweziqondiso ezilukhuni ngoLwesibili.
Abangena elizweni bakhangelelwe ukuthi bahlolwe kusetshenziswa uhlobo lwe PCR test, okuzatsho ezinye indleko. Njalo, noma bengaze betholakale bengalalo igciwane leCovid-19 bayavalelwa endaweni zama quarantine centres, bebhadala indleko zokuhlala endaweni lezi.
Bengaphumelela okuyafika ekhaya, bazathola ukuthi izikhathi zokubona izihlobo labangane zifinqiwe, sekufakwe uhlelo lwe curfew olusungula ngehola lesitshiyagalolunye ntambama kusiya kwelesine ekuseni.
Abahlatshwe ijekiseni yokulwisana leCOVID-19, yibo kuphela abayabe bevunyelwa ukungena endaweni zokuzilibazisa ezifana lamabhawa kanye lama night clubs.
Inengi labeZimbabwe kweleBotswana lithi iziqondiso lezi yindlela yokutshela abangaphandle kwelizwe ukuthi bengabuyi ekhaya.
UMnu. Dumezweni Ncube uthi kucina kungelasizatho sokuthi abantu bahlabe ijekiseni uma wonke umuntu efakelwa imigoqo efanayo.
“Ukuvalelwa kuma quarantine centres ngemva kokuhlola usebenzisa iPCR test akuzwisiseki. Ohulumende bethu kade bechothoza amazwe angentshonalanga besithi akumelanga kuvalelwe ukuhamba kwabantu kodwa siyababona nampa sebesivalela.”
UMnu. Andreas Sibanda uthi kuyadanisa ukuthi kuqhamuke uhlobo olutsha ngesikhathi inengi lilungiselela ukuya ekhaya.
Kodwa uthi kuqakathekile ukuthi inkokheli ingaphumi lemqondo ezalimaza impilo kazulu, njengalokhu okwenzakala ngesikhathi sama lockdown.
“Ukuqhamuka kohlobo lwe Covid-19 olutsha siyakubona. Kodwa okuqakathekileyo yikuthi ohulumende bengathathi amanyathela abazazisola ngawo kusasa. Siyabona eleZimbabwe selihle laqalisa ukuwomisa imithetho, asazi ukuthi lokhu kuyenziwe kukhangelweni. Silethemba lokuthi bekulesizatho esiqinileyo, ngoba osekukhona yikuthi kuzaba labantu abalutshwana abaya ekhaya ngenxa yeziqondiso lezi.”
UMnu. Ngqabutho Mabhena, obona ngezizalwane zeZimbabwe ezingaphandle kwelizwe eseSouth Africa, uthi banengi abangasoze benelise ukuya kukhefu leKhisimusi ekhaya.
“Udaba lolu luzakwenza ukuthi inengi ebelifisa ukuhamba lingahambi. Uma kuvalelwa abantu kuquarantine okwamaviki amabili, kutsho ukuthi abantu bazadlala ikhisimusi bekuquarantine. Lokhu sekuphazamisa inhlelo zabantu zokuvakatsha befisa ukuthi bayefika emakhaya.”
EleZimbabwe njalo lithembele kakhulu emalini engena elizweni ithunyelwa yizizalwane ezingaphandle kwelizwe.
Ngesikhathi sekhefu lekhisimusi, inengi elisebenza phandle kwelizwe lingena lisebenzisa kakhulu imngcele efana leBeitbridge kanye lePlumtree, okukhukhumeza isikhwama sikahulumende.
UMongameli Mnangagwa uthi inyathela lokuqinisa iziqondiso lizahlaziywa njalo ngemva kwamaviki amabili, kodwa abanye sebevele sebeqala ukulahla ithemba lokuthi bazakuyafika ekhaya ngesikhathi seKhisimusi.