Ezinye izizalwane zeZimbabwe zithi kumele uhulumende akubeke sobala ukuthi ilizwe lisebenzisa imali enganani njalo lizatholani kulandela ukuhambisa ihlekana lebutho lomvikela elizweni leEquatorial Guinea.
Abakhulume leStudio 7 abagoqela uMnu. Giles Mutsekwa owayengomunye wabaphathintambo ababebona ngokwenzakala eZimbabwe ngesikhathi kulohulumende womanyano, bathi akukhanyi ukuthi ilizwe lisebenzisa malini okwamanje njalo lizatholani ekuhambiseni amasotsha la.
UMutsekwa uthi kuyamangalisa ukuthi balutshwana abantu abakwazi ukuthi kwahanjiswa amasotsha amanengi kanganani kulelolizwe ukuthi ayevikela iziphathamandla zenguqu lezombusazwe kumncintiswano weAfrican Cup of Nations ophele izolo.
Umphathintambo wezomvikela welizwe uMnu. Sydney Sekeramayi usanda kutshela idale lephalamende ukuthi ilizwe lahambisa amabutho kwele Equatorial Guinea kulandela isicelo esenziwa yilelolizwe.
Kodwa-ke katshongo ukuthi kwahambiswa amasotsha anganani njalo lokuthi ilizwe lizatholani kulokhu.
Sizame ukumthola kumakhalekhukhwini lamuhla kodwa kasimtholanga ngenxa yokuthi kade engaphenduli ucingo lwakhe.
UMnu. Rodger Mthethwa owayekubutho leZimbabwe walwa eDemocratic Republic of Congo lapho ilizwe elahambisa khona ibutho lokuvikela uhulumende kaLaurent Kabila, uthi ilizwe kalisoze lithole lutho ngokuhambisa ibutho elizweni le Equatorial Guinea.