Ukusilela kwamafutha ezimota sekudale ukuthi abatshayeli bama taxi bakhuphule imbhadalo yokugada besithi sebethola lawo mafutha nsitha lapho athengiswa ngentengo ephindwe kabili.
Udubo lokusilela kwamafutha ezimota luqale ngoMvulo njalo kuthe kufika oLwesithathu kungasela ngitsho lethonsi lalawo mafutha emagalajini okudala ukuthi aqalise ukuthengiswa ngomkoto.
Isigubhu esithwala amalitha amahlanu sibiza amadola alitshumi lambili $12 kulabo abathengisa lamafutha ngudlu.
Lokhu kudale ukuthi abatshayeli bama taxi labo bakhweze imbhadalo yokugada izimota zabo ngesilinganiso samatshumi amahlanu ekhulwini 50% kusukela ku50c umuntu ngamunye kusiya ku 75c.
UMnu Amos Siziba ngomunye walabo abalele egalajini leZuva ngoLwesithathu belinde lawamafutha njalo uthi lokhu sekuphazamisa ibhizimusi labo.
“Silele khonapha egalajini sezidubekile lapha eGwanda bakithi, thina njengathi odriver bemitshova emathekisini asisatshovi sitshona simile siyabe siqhatshiwe siqhatshiwe njalo umnikazi wemota uyabe efuna imali yakhe akuxotshe umsebenzi.”
UMnu. Thamsanqa Ndebele uthi uhulumende kumele athele lawamafutha emagalajini ngobunengi ukuze labo abawathengisa ngentengo ephezulu nsitha behluleke ukukwenza lokhu.
“Kasitholi ifuel eyeneleyo kodwa nxa singaba layo khonapha eGwanda sibe layo eZuva sibe layo Glow sibe layo koCaltex at the same time sibe layo e CMED it means labana abeBlack market bona sebesiba kudisadvantage imarket yabo siforfeit so sile challenge enkulu so sicela abadala basibonele into le bakulungise.”
Ayisibo bezimota kuphela abakhala ngodubo lokusilela kwamafutha lokhu, uMnu Kekeletso Silaigwana uyemba igolide njalo uthi umile ukusebenza ngenxa yokuthi imitshina ayisebenzisayo ifuna amafutha.
“Ngiminer ngise Cindrella D okwakathesi udubo esilalo yidiesel ayikho sesilamalanga sibili singasebenzi ngoba amagenerator lama compressor konke kusebenzisa idiesel , so idiesel isibisela emuva kakhulu ngoba simile okwakathesi asisebenzi.”
UMnu. Mduduzi Tshuma owebandla elephikisayo eleMDC T ekhokhelwa nguMnu Nelson Chamisa ngomunye walabo abakade belinde ukuthela amafutha njalo uthi loludubo luveza obala ukwehluleka kukahulumende.
“Abantu abanengi ngibonile ekuseni bewalker besiza etown ngoba akulafuel eGwanda ngibona ingani uhulumende okhona uyehluleka ukuthi aqede udubo olukhona ngenxa yokuthi abamagalaji ma ubabuza bathi abala foreign currency yokuthi bathenge ifuel evela emazweni.UHulumende uyehluleka ukuthi alethe iforeign currency enengi abantu bawode ifuel ibenengi elizweni.”
Umphathintambo obona ngezenzakala eZansi yemaNdebeleni, uMnu. Abedinico Ncube, kathandanga ukukhuluma okunengi ngaloludaba esithi luzalungisiswa kunsukwana ezilandelayo.
