Inani labantu abahlolwa betholakala belegcikwane leCOVID-19, eZimbabwe liya liqansa ngesiqubu esethusayo osekubangele ukuba ingcitshi zezempilakahle bakhuthaze uzulu ukuba aqakathekise ukuzivikela ekubambeni lumkhuhlane kanye lokulandela iziqondiso zokugeza izandla, ukugqoka amamask lokungasondelelani iSocial Distancing.
Umqondisi wesibhedlela seMpilo Central, koBulawayo, uDokotela Solwayo Ngwenya ukhuthaza uzulu ukuba alandele imilayo yokuvikela ukuthelelwa igcikwane leCOVID-19.
"Kudala sakhuluma ukuthi ilockdown ngeke iphele khathesi ngoba igcikwane lecoronavirus liyahlupha ngesikhathi somqando yikho inyanga ezibuyayo ngezomqando njalo ibulala kakhulu ngesikhathi somqando. ILockdown iyaphela kuboAugust September le. Akulamitshado, izikolo akulamaChurch azenziwa ngalesiskhathi. Abantu lokhe bexokozela kundwendwe zempuphu alilaleli igcikwane leli lilakho ukubulala abantu uma lingalandeli imilayo esilitshela yona."
UDokotela Ngwenya uqhubeke echasisa ubudlelwano becoronavirus lomqando.
"Igcikwane leli linjengomvimbano lilandelana lomqando. Igcikwane leli lingafika lapha lilithole lixokozela phandle kumalayini ngendlela eliyenza ngayo izabulala abantu abanengi. Uhulumende ufake iziqondiso zokuthi ligqoke amaface mask livale imilomo lamakhala kodwa lina litholakala livale imilomo litshiye amakhala phandle lokhu kuzakwenza ukuthi icorona ilibambe.
“Uthola kundwendwe zempuphu lamabhanga abantu bayaxokozela. Kumelee lime kahle. Umkhuhlane lo ufana leBird Flue uthola abantu bekhefuzela bedinga ukuphefumula. Siyalixwayisa kakhulu uma lihamba kumele ligqoke amaface mask kuhle lingaphefumulelani lingasondelelani kodwa uma lingakwenzi lokhu abantu abanengi bazatshabalala ngiyalicela zulu ukuba lilandele imilayo esilipha yona."
UDokotela Ngwenya uthi isibhedlela seMpilo Central Hospital sesaqala ukuhlola izisebenzi kanye lezigulane umkhuhlane weCOVID-19.
''Sesiqalile ukutester odokotela labongikazi izisebenzi ukuthi igcikwane lecorona virus abalalo yini. Siqeda lapho sizabe sesihlola abazohlolwa lapha ukuze igcikwane leli lingamemetheki lisiyaphambili.
Isiphathamandla senhlanganiso ebona ngokuvikela abantwana kumikhuhlane ehlukeneyo iJohn Snow Research and Training Institute, uNkosikazi Adelaide Eleanor Shearley, ukhuthaza uzulu ukuba ahlanzeke ngoba akukabi lejekiseni yokuwuvikela.
“Lonyaka sizakuba lenkinga yokuba sesilomkhuhlane omutsha oweCOVID-19 osuqede abantu umhlaba jikelele njalo awukabi lejekiseni yokuwuvikela ngoba ukuvikeleka kwakhona yikuhlala ezindlini ukugeza izandla ukungabi lemibuthano uzakwenza ukuthi amajekiseni esiwapha abantwana abesesehla engehla imikhuhlane esasesiyiqedile izavela sizaqala ukubona abantwana bebulawa yindingindi, Ngakho siyalinxusa bazali ukuba lingayeki ukusa abantwana ukuba bayehlatshwa lamajekiseni okuvikela imikhuhlane.’’
Abezempilakahle bakhuthaza uzulu ukuba aqaphele ahlale emakhaya ikakhulu kulez’insuku inani labatholakala beleCOVID-19 likhuphuka okwethusayo.
Lisiyatshona ilanga ngeSonto besekulabantu abedlula amakhulu amabili lengxenye - 282 abahlolwe batholakala belegcikwane leCOVID-19 eZimbabwe.
