Ele Zimbabwe ngoLwesine libambisane lamanye amazwe womhlaba ekunanzeni okwenziwa ngabesifazane emaphandleni ele International Day of Rural Women.
Inhlanganiso yomhlaba wonke eye United Nations ithi ilanga leli liqakathekisa okwenziwa ngabesifazane okunjengokulima, ukudingela immuli ukudla kanye lokuzama ukuqeda ubuyanga bukazulu.
Umsakazo weStudio Seven uxoxisane labesifazane abanengi ngabahlangana lakho nsukuzonke emaphandleni.
Omunye wabo nguNkosikazi Febi Dube weSinampane eBinga esabelweni seMatabeleland North otshele iStudio 7 ukuthi usebenza labanye obesifazane ekudingeni imali yokuphilisa immuli zabo.
UNkosikazi Dube uthe kulamaqembu abesifazane edlula amatshumi ahlanganisa imali yokubolekana yokuthenga impahla yokuthengisa.
UNkosikazi Dube uthe, “Nxa singayenza umhlangano siyaboleka omunye wethu imali ayisebenzisa ukuthenga okufunekayo. Nxa engathengisa impahla yakhe uyasinika imali yakhe eyebe isizele okuyimadlana esikusebenzisa ukubolaka njalonje.
“Mina kangilasitolo ngakho engikwenzayo yikuthatha imali le ngithenge okokuthengisa. Abanye bathenga imbuzi bayezithengisa emadolobheni enjenge Harare. Sesiyenelise ukwenzela immuli zethu izinto ezimangalisayo. Mina sengize ngathenga inkomo njalo ngakha indlu yamazenge ngokwenza lokhu.”
Uthe akumelanga abesifazane bahlale phezulu kwezandla zabo njengoba abesilisa besehluleka ukuthola imisebenzi emadolobheni.
Uphinde wathi bancedwa yinhlanganiswa okuthiwa yiBaswilizi Trust abancedwa khona ngumqondisi wayo uMary Sibanda.
Uthe kulamaqembu angamatshumi amabili lesitshiyangalo mbili asebenza gadalala ukwenzela ukuphucula immuli zabo.
Uthe okudanisayo yikuthi uhulumende kabancedi kangako kuhlanganiso zabo ukwenzela ukuthi basebenze ngcono njalo bathuthuke.
