Bethukile abazali beZimbabwe abahlala kwele South Africa ngokuthunjwa kwabantu inani elikhulu labo kungabantwana labasakhulayo.
Mhlaka 20 Mfumfu lonyaka abantwana abane abayizelamani uZidan Moti oleminyaka eyisithupha, uZayyad Moti ole 11, uAlaan Moti ole13 loZia Moti ole15, bathunjwa ngamadoda ayisikhombisa ayehlome ephelele abakhipha ngodli emoteni eyayibasa esikolweni edolobheni lePolokwane eLimpopo.
Amapholisa athi laba bafana khona betholakale ngoLwesine sekwedlule amalanga angamatshumi amabili.
UNdumiso Tshuma oleminyaka elitshumbi lasitshiyangalombili- 18, watshiywa nguyise ezitolo eziduzane lendlu yangakibo elokitshini leYeoville, eJohannesburg, esiyagela inwele mhlaka 7 Mpandula lonyaka.
Uyise uMnu. Nqobile Tshuma, uthi kuze kube lamhlanje indodana yakhe ayibonakali. UTshuma ucela yiloba ngubani ongabalomkhondo wokulonda indodana yakhe ukuthi athintane laye kumakhalekhukwini Egoli kunobholo ezithi 0739155602 loba athinte ipholisa eliphethe loludaba enkambeni ye Yeoville uWarrant Officer Moketse kunombolo ezithi 0663023364.
“So bengicela ukuthi abantu baka Jehova lingidingise le ngane. Bengicela lalaba abafuqwa ngumoya oyingcwele ukuthi lets pray until something happens. No satanic power, no kidnaper’s power can stand against God who created the heavens and the earth. Ngiyacela sikhuleke le ingane ibe covered with the blood of Christ and divine protection aze ajike abuye ekhaya engophilayo. Ngiyakholwa ukuthi one day uNdumiso Tshuma is going to come back home e-intact. God bless all of you. UNkulunkulu alibusise.”
Lezi yizehlakalo ezimbili kuphela phakathi kwezinengi kakhulu ezenzakala kweleSouth Africa ngosuku. Ngokwesibalo samapholisa bayedlula inkulungwane eziyisithupha (over 6,000) abantu abathunjiweyo phakathi kuka 2019 lo 2020. Banengi abantwana phakathi kwaleli nani. Inengi lalaba bantwana lithokala lifile kanti abanye banyamalala kokuphela.
Umgcinisihlalo wenhlanganiso yeZim Imbokodo, uNkosazana Victress Mathuthu, uthi njengenhlanganiso emela abazali abalabantwana abafunda lokuhlala kweleSouth Africa bakhathazeke kakhulu.
“Kusiphatha kabuhlungu kakhulu ukwenyuka kwezinga labantwana abanyamalalayo lapha eMzansi Africa. Abanye badojwe sebefile becuyiwe. Abanye badojwe bebulewe kungaziwa ukuthi babulewelwani. Kuyasikhathaza kakhulu. Siyadinga siyaswela imbangela yokwazi ukuthi abantwana laba babulowelwani kwenzenjani. Ngubani esingamkhomba ngomunwe sikwazi ukuthi kwenziwani ngezitho lezi ezicuywa ebantwaneni.”
Ngokutsho kocwaningo olwethulwe yinhlanganiso yeInstitute for Security Studies kweleSouth Africa abanye balabo bantwana bathathelwa ukuhlukunyezwa ngokocansi kanti abanye bayabulawa kufuneka izitho zabo.
Kwezinye izehlakalo kuyabe kungumbango wabantwana phakathi kwabazali asebehlukene kantike abanye batshontshwa yizikliwi eziyabe zifuna ukuhlawulwa imali ukuze zibakhulule.
Amapholisa wona axwayisa abazali ukuthi baphangise ukubika nxa umntwana esenyamalele loba ethunjiwe hatshi ukuhlala amahola angamatshumi amabili lane njengalokho okutshiwo ngabanye ngoba lokhu akusilo qiniso.