Inhlanganiso zabamela abakhubazekileyo zikhala ngokusilela kosekelo emisebenzini yazo lokukhangelelwa phansi okulokhe kuqhubekela phambili kusenza ukuba impilo ibenzima ngokwengezelelweyo kwabakhubazekileyo.
Abakhubazekileyo babhekana lobunzima bokungenelisi ukuzenzela ngalezi zikhathi umumo womnotho umubi kanje elizweni okwenza ukuba inengi labo libe ngeliphila ngokucela ezitaladeni.
Inhlanganiso emanyanisa inhlangano ezimela abakhubazekileyo eye Federation of Organizations of Disabled People in Zimbabwe ngoLwesihlanu yenze umhlangano eHarare isithi abakhubazekileyo sebephazamiselwe impilo yabo ngokuphindwe kabili ngenxa yokusilela kwemali elizweni lemithelo ebhadaliswa ngamabhanga kunye lokudinwa osokusenza abaphathisa ngemali.
Umeli wabakhubazekileyo edale le Senate, uSenator Nyamayabo Mashavakure, uthi lokhu kuphazamisa lenhlalakahle yabo lasezindlini.
UNkosikazi Sibonisiwe Mazula, wenhlanganiso ye Zimbabwe Downs Syndrome Association yako Bulawayo, uthi usekelo alukho sibili kumisebenzi yabo.
Uthe olunye udubo yikukhangelelwa phansi kwabantu abakhubazekileyo ikakhulu abantwana abaphila lesimo seDowns Syndrome.
UNkosikazi Constance Sibanda, okhokhela inhlanganiso ye Zimbabwe Women With Disabilities esebenzela kakhulu koBulawayo, uthi inkinga yikuhlukuluzwa kwabesifazane lamantombazana abakhubazekileyo lokusilela kosekelo lkabezindaba ukuba beveze imisebenzi abayenzayo.
Inhlanganiso ezinengi zitshengise ukukhathazeka ngodaba lokunganikezwa ithuba ngabethula izindaba eziphathelane labo kodwa bancoma inkampani yamaphephandaba eye Zimpapers ngokuzama ukwethula imbiko yabo abahle bayinikeza umvuzo kumbuthano walamhlanje ongumvuzo owanikezwa lakumsakazo wakwele Botswana lenkampani ezimeleyo yakwele Malawi ekhankasela imisebenzi yabakhubazekileyo.
