Abafelokazi eZansi yeMaNdebeleni bakhala ngenhlawulo efunwa ngumthethwandaba weHigh Court ngesikhathi kwabiwa ilifa.
Bafuna njalo kuguqulwe eminye imithetho edala ukuthi bengafinyeleli ilifa labo.
Lokhu kuphume emhlanganweni owenzelwe eGwanda obujonge ukufundisa abefelokazi lentandane mayelana ngemithetho yokwabiwa kwelifa.
Inengi labafelokazi lithi ngaphandle kokukhuphaka kwenhlawulo le, umthethwandaba uthatha isikhathi eside ukuthi wabe ilifa okudala ukuthi izihlobo zihluthune leyo mpahla.
Umfelokazi uNkosikazi Sihle Nyathi uthi seleminyaka eminengi ezama ukutshintsha indlu ibesebizweni lakhe kodwa imali efunakalayo inengi kakhulu.
“Isicelo sami yikuthi silendlu koBulawayo manje kumele itshintshwe ibesebizweni lami. Isicelo sami yikuthi ubaba nguye owayesebenza so amacosts akhona ayadula okokuthi lakhathesi lokhu ngisehluleka ukuthi ngiyitshintshe indlu leya, amacosts akhona aphezulu okokuthi imali yakhona angazi ukuthi ngizayithatha nga.”
Abefelokazi abangene lumhlangano bafundiswe ngemithetho yokwabiwa kwelifa njalo UNkosazana Thulani Dube uthi bebesemnyameni ngeminye imithetho ebavikelayo lapho betshiywa ngomkabo.
“Sesavela satshontshelwa yizihlobo zamadoda basithathela izifuyo zethu basithathela konke esasilakho ngenxa yokungwakwazi manje namuhla sesikwazi okwenzakalayo.”
Ngaphandle kwemali, abafelokazi bathi bafuna eminye imithetho yokwaba ilifa efana lale eyesithembo iguqulwe.
“Kuvamile ukuthi ubaba engathatha unkosikazi wesibili umama wakuqala uyathi ngiyahamba ngiyezihlalela emakhaya. Kuba luhlupho nxa ubaba ethe wasitshiya ngoba umthetho uthi uthatha lapho obuhleli khona sebuzwa umama ubuhlala nga bengihlala ekhaya unkosikazi wesibili ubuhlala nga bengihlala eGwanda thatha eGwanda.”
Umqondisie wedale laphezulu eleHigh Court (Master of High Court), uMnu. Eldard Mutasa, uxwayise omama abasemendweni ukuthi impahla efana lezindlu kumele ibhaliswe ngamabizo omabili elikababa lelikamama ukuze kungabi lodubo lapho omunye engabhubha.
“Sikhuthaze obaba ukuthi lathi omama sibhalwe ezindlini ukuze sibe yingxenye ye ownership yezindlu zakhona ngoba emveni omunye engadlula kuba lula.”
Umkamongameli welizwe UNkosikazi Auxillia Mnangagwa obekumele angene lumhlangano kenelisanga ukufika njalo uthumele umsekeli kamphathintambo obona ngezabelo uNkosikazi Jenipher Mhlanga.
UNkosikazi Mhlanga uthe kuqakathekile ukuthi abefelokazi babekwazi limithetho ukuze bengaqilwa.
“Injongo ekhona njalo yikuthi sicebisane lani bafelokazi, omama labobaba abatshiywayo ukuthi vulani ingqondo lilimuke ngodaba lwenotho.”