Ilitshe lokukhumbula abantu ababulawa ngesikhathi sombhuqazwe weGukurahundi eBhalagwe libikwa lidilizwe ngokuphoselwa kwebhomba ngoLwesithathu kusisa ngabantu abangaziwayo.
Lokhu kwamukelwe ngokuthukuthela okukhulu linengi labantu eMatabeleland leNkabazwe.
Ilitshe lesikhumbuzo elakhiwe ngomnyaka odluleyo ngabenhlanganiso yeIbhetshu LikaZulu bemanyene labantu bemangweni weBhalagwe, libikwa lifunyenwe libhidliziwe.
UMabhalane jikelele weIBhetshu LikaZulu, uMnu. Mbuzo Fuzwayo, uthi lokhu kuyethusa.
Isikhulumi sebandla leMDc Alliance koBulawayo, uMnu. Swithern Chirowodza, uyasisola kakhulu lesi sehlakalo.
Ilunga lebandla leZANU-PF, uMnu. Joseph Tshuma, laye usole kakhulu okwenzakaleyo esithi senziwa ngabantu abangafuni kuthula eZimbabwe.
UNduna Mathema laye usole lesi sehlakalo esithi isehlakalo lesi zimtshiye ebabambe owangaphansi.
USibalukhulu wakoBulawayo, uNkosikazi Judith Ncube, uthi ubengakezwa ngalesi sehlakalo kuthi inkokheli zomdabu ezibalisa uChief Mtshana Khumalo, Chief Nyangazonke, lezinye labo bathi bebengakatholi umbiko ngaloludaba.
Amapholisa aweMatabeleland South athi udaba lokudilizwa kwelitshe sebelutholile bazaluphenya njalo lumangalwe ngaphansi kwenombolo ezithi 4542320RRB ngoLwesine.
Bathi abakatholi umkhondo walabo abadiliza amanye endaweni efanayo.
Sekungokwesithathu kudilizwa amatshe ezikhumbuzo zeGukurahundi eBhalagwe kungatholakali umkhondo wabadilizayo osekutshiye inengi likhathazekile.