Imizamo yokuvuselela iqembu elilodumo kumbali yomdlalo wenguqu, eleZimbabwe Saints iyaqhugezela njengoba leliqembu selinqotshwe kabili emidlalweni emithathu eseliyidlale esigabeni seSouthern Region Division One.
Ekhuluma ngemva komdlalo wabo lapho abanqotshwe khona liqembu leTalen Vision nge3 ka nya ngeSonto eyedluleyo, umqeqetshi weqembu leZimbabwe Saints, uReginald Buhali, uthe kuzamele bafunde ukulungisisa amaphutha abawayenzayo ukuze balungisise ukudlala kwabo.
“Wonke umdlalo esiwudlalayo uza lengxaki ezitshiyeneyo njalo kumele sibone ukuthi sibhekana lazo njani ngoba sisafunda njalo sisakha iqembu lethu.
"Khona vele ukudliwa asikufuni kodwa nxa sekwenzakele kumele sikwakumele sicubungule sibone ukuba kuyini esikwenze kuhle kuthi lokho esikuphazamisileyo sihambe siyekulungisisa,” kutsho uBuhali.
Iqembu leZimbabwe Saints liphenduke kusigaba seSouthern Region Division One nyakenye ngemva kokuba libhadale laqeda imali ebeliyikoloda inhlanganiso yeZimbabwe Football Association.
Leliqembu ligunyulwe kusigaba saphezulu ngomnyaka ka2011 layadlala kusigaba seSouthern Region Division One lapho elixotshwe khona ngomnyaka ka2014 ngoba lingabhadalanga imali yokubhalisa ekhutshwa ngamaqembu ekuqaleni komnyaka.
Ngo2015 like ladlala kusigaba sika Division 2 kwathi ngemva kwalokho kwaba angani selitshabalele laselivuselelwa njalo nyakenye.
Iqembu leZimbabwe Saints lilemiklomelo emithathu ngemva kokudlala kathathu lonyaka njalo ngempelaviki ezayo lizadlala lele CIWU ngeSonto enkundleni yeWhite City.
Phezu kwengalane yemiklomelo kuhlezi iqembu le Hwange lona elilemiklomelo eyisikhombisa kuthi endaweni yesibili kuleqembu leRatanang lalo elilemiklomelo eyisikhombisa kodwa lihlohle kalutshwane.
Iqembu le Hwange libe ngutshiki lobhanqa 0 ka 0 lele Ajax ngoMgqibelo kuthi ele Ratanang lona libe ngutshiki lobhanqa 1 ka 1 lele Quality Foods.
Endaweni yesithathu kuleqembu leTalen Vision elilemiklomelo eyisithupha kodwa umqeqetshi walo uLizwe Sweswe uthi lonyaka injongo yabo akusiyo eyokuphakamisa isicoco seligi.
“Okuqakathekileyo yindlela esifuna bedlale ngayo njalo ngicabanga ukuthi lokhu bekubamba kancane kancane.
Ekucineni vele abafana laba uyathi usithi ngisabakhulisa kodwa bona ukunqoba bazabe bekufuna njalo khonokho kuyabapha amandla okuthi siqhubekele phambili,” kutsho uSweswe.
Kumidlalo yeviki lesine kulomdlalo ogobhozisa amathe emalahleni lapho iqembu le Hwange elizadibana khona lele ZPC Hwange ngoMgqibelo.
Iqembu leRatanang lona lizavakatshela e Plumtree ngoMgqibelo ukuyadlala lele Mainline kuthi ele Talen Vision lizadlala lele Indosakusa ngase Filabusi ngeSonto.
Kweminye imidlalo eyeviki lesine iqembu le Indlovu Iyanyathela lizadlala lele Ajax ngase Luveve kuthi ngosuku olufanayo enkundleni efanayo njalo, ele Makhandeni Pirates lizadlala lele Binga Pirates.
NgoMgqibelo enkundleni ye White City iqembu leArenel Movers lizadlala lele Mountain Climbers kuthi eleQuality Foods lizadibana lele Bosso 90.
Emdlalweni ozakuba seVictoria Falls iqembu le Mosi Rovers lizadlala lele Casmyn ngoMgqibelo.