Osomabhizimusi akade bekumbukiso walonyaka owe Zim Expo bathi wenziwe kahle umbukiso lo olakhu ukubalethela inzuzo kwezamabhizimusi.

Bathi bazakhulumisana lalabo abaxoxe ngokudlelana ukwenzela ukuthuthukisa amabhizimusi abo.

Omunye wabathokozelele umbukiso lo, uMnu. Johnfet Sibanda, olebhizimusi lokuthengisa imithi koBulawayo, uthi ubukahle umbukiso weZim Expo ngoba ukhulumisane labanye osomabhizimusi ngokudlelana.

“Uyazi ngijabulile kakhulu bengingakhangelelanga ukuthi ngizahlangana lento enje. Bengivakatshile ngingalandanga ibusiness expo kodwa ngithe ngisizwa ngayo ngajabula kakhulu. Ngihlangane labantu abanengi kakhulu ngabona ukuthi abantu balapha ngabantu abafuna ukuthi nga iZimbabwe iyathuthuka … Ngithabile ukuthi ngizuzile abanye engilakho ukudlelana labo kubhizimusi lami.”

Omunye njalo ngoNkosazana Andile Mpofu, othengisa imicilikico etshiyeneyo njalo lakho konke okuhle okugqokwa ngabantu abadabuka kuzwekazi leAfrica. Ngiyajabula ukuthi ngithole abantu abanengi abafisa ukuthi sibelobudlelwano obuphezulu.”

Lokhu kukhuthazwe nguMnu. Quite Ncube, omunye wabaqondisi bombukiso weZim Expo, othi kuyajabulisa ukuthi osomabhizimusi balakho ukudlelana kulandela ukuhlangana kwabo eChicago embukisweni weZim Expo.

“Siyajabula ukuthi umbukiso lo uqhutshwe ngemfanelo njalo kukhanya kulabosomabhizimusi abalakho ukusebenza ndawonye ngesikhathi esilandelayo. Kube kahle kakhulu konke esikwenzileyo.”

Kumbukiso wokudinga isiqamulamayezi oweMiss Zimbabwe USA, uNkosazana Nothando Jack unqobe abanye wathola inkulungwane lamakhulu amahlanu amadola - $1,500, ukudla okulungiswa eHonde Valley lokunye okutshiyeneyo.

Ababili abamlandeleyo kumncintiswano lo nguNkosazana Natalie Mushore (first princess) loNkosazana Nyasha Madzkure (second princess).

Kwezemiculo, akade bekumbukiso lo benelise ukubukela uJah Signal owacula ingoma ethi Stonyen kanye loCindi Munyavi ohlabela okumangalisayo.

Umbukiso weZim Expo wenziwa kanye ngomnyaka edolobheni elikhethwe ngabaqondisi beZim Expo. Inengi impahla ebukisweni weZim Expo njalo lesi yisikhathi sokuthi abadabuka kwele Zimbabwe baxoxe ngokutshiyeneyo.