Amapholisa athi abophe abasolwa abathathu abatholakale belamasaka embanje ezilesisindo sama-tonne citshe amane, 3.9 tonnes kumbe i-3,900 kgs, eHarare.
EMasvingo lakho kubotshwe abasolwa ababili ababikwa betholakale belensangu ezilesisindo sama-kilogram angamakhulu amabili, i-200 kgs.
Ukubotshwa kwabantu laba kuyingxenye yohlelo lwamapholisa olokulwisana lokusetshenziswa kwezidakamizwa ikakhulu abasakhulayo.
Kunsukwana ezedluleyo kubotshwe njalo owesilisa otholakale elezidakamizwa zomkhakha we-crystal meth eMatsh'amhlophe koBulawayo kanye labasolwa akade besebhasini ebisiya eMasvingo ivela eBeitbridge abatholakale belamabhokisi adlula ikhulu, 120, abelomuthi wokukhwehlela osetsenziswa njengesidakamizwa.
Izidakamizwa ezinengi zibikwa zingeniswa elizweni ngomngcele weBeitbridge ngaphandle komthetho.
Isiphathamandla senhlanganiso yeBeitbridge Progressive Residents Association uMnu Jabulani Makhado utshele iStudio 7 ukuthi udubo lokusetshenziswa kwezidakamiswa solubhahile kakhulu eBeitbridge.
Forum