Abenhlanganiso yengcwethi ezicubungula inhlalakahle kazulu eyeZimbabwe Democracy Institute (ZDI) bethule impumela yophenyo oluveza ukuba uhlelo lukahulumende lokulima olweCommand Agriculture luyehluleka ukufeza injongo yalo ngenxa yokungenela kwabezombusazwe ikakhulu abebandla elibusayo eleZanu PF.
Uphenyo lolu lwenziwe ngesikhathi ilizwe libhekane lodubo lwendlala enkulu okumangalisa abantu abanengi basala bezibuza ukuba kwenzakalani khona kulohlelo lweCommand Agriculture olwabelwa imali enengi kangaka kuBudget.
Loba nje uhulumende esithi udubo lwendlala lubangelwa yikungani kuhle kwezulu uphenyo lolu luveza ukuba kulamabhiliyoni amathathu yamadola eMelika-US$3billion, eyabelwa abalima ngokuthelezela ukuze bancedakale ukuhlawulela indleko ezigoqela lokuthenga okunye okokulimisa.
Ekhuluma ngemva kokwethulwa kwempumela yalolu phenyo eyinye ingcwethi ephatheke ekuqhutshweni uMnu Bekezela Gumbo uthi udubo yikuthi iCommand Agriculture iguqulwe yaba luhlelo lwezombusazwe.
“I command agriculture yehlulekile ukuthi isiphe lokho esikade sikukhangelele. Besikhangele ukuthi abalimi bethu basazaqalisa ukuvuna okugcono, ukuthi indlala izaphela. Njalo okunye yikuthi icommand agriculture le isisetshenziswa njengezombusazwe ukusekela ibandla elibusayo”
UGumbo uqhubeke ethi imali okwakumele iye kubalimi yaphelela ezandleni zezikhulu zebandla le ZANU PF.
“Imali ezinengi ziya ezikhwameni zabantu abangabiseli imali kuhulumende. Kayisoze yenze uhlupho lumumbo luphele. Uhlelo lolu luveza ukuthi uhlelo lwe command agriculture wabujelwa ukuqinisa umbuso ka hulumende okhona, kuzakuba nzima ukuthi abandla amanye ancintisane lebandla elibusayo”
UGumbo uthi ugwalo lolu lunikeza imibono yokuba uhulumende kumele adingisise lapho okwaya khona limali njalo yathathwa ngubani.
“Ekucineni kogwalo lwethu kudingakala ukuthi kube le audit eyabe ikhangele I coammand agriculture kuphela. Ukuthi ngubani owathatha imali. Kuyini okungazange kufike ezandleni zabantu. Uhulumende kumele enze uphenyo lokuthi kuyini okwenza abantu belambe khona”
Omunye okade esemkhosini wokwethulwa kwalolugwalo, uMnu Nkosikhona Dibiti uthi buyadanisa ubugovu beZANU PF.
“Masikhangela inkalakatha zemali ezatshontshwayo sikhangela amabhiliyo emali aphumayo kodwa ukudla lokhu kuswelakala. Thina njengezizwalwane sibona ukudla kuswelakala. Kuyadanisa kakhulu ngoba asikwazi ukuthi ukudla kubonakala ngaphi. Sikhuluma nje kule ndwendwe ezitolo ukudla akusathengeki”
Lokhu kusekelwe yisakhamuzi se Harare uNkosikazi Mary Marimo yena othi njengabesifazana kuyabadanisa kakhulu ukutshaphazwa kwemali ngale indlela.
“Ukuthi kudliwe na, ukuthi kuzaphekwa na ngumuntu ongumama okhangelayo. Kuyaphambanisa kakhulu indlela omama abaphila ngayo kuseke kuphambanise labantwana. Ezikolo emakhaya kubhadalwa ngamabele”
Ugwalo lolu luveze ukuba lokhu uhlelo lwe Command Agriculture lwaqalayo isilinganiso sesivuno okumele sitholwe lilizwe siqhubeka sisehla yena uhulumende ethululela imali enengi kilo kodwa lungaphumisi lutho.
Uhulumende uyavuma ukuthi loluhlelo oluphumisi izithelo njengalokho obekukhangelelwe kungalesi sizatho umpathintambo wezemali uMnu. Mthuli Ncube ephume lesinqumo sokuthi abalimi baphiwe incwadi zokuyakhweleda lezi mali emabhanga hatshi ukuthi bayephiwa libhanga elikhulu lelizwe ele Reserve Bank of Zimbabwe.
