Abalandeli bebandla leZapu abalokhe bephakathi kwebandla leZanu PF bathi lokhe bemele uzulu kubandla leli loba kulabantu abakhonona besithi sebaphelelwa ngumphako.
Bathi lokhe bebambe amazwi kamuyi uJoshua Mqabuko Nkomo owathi amabandla la asemanyene.
UNkomo lowayengumongameli welizwe leZimbabwe, uMnu. Robert Mugabe balobelana isibumelwano somanyano esibizwa ngokuthi yi-Unity Accord mhlaka 22 ngoMpalakazi ngomnyaka ka1987.
Kodwa-ke abanye abalandeli bebandla leZapu, abagoqela uMnu. Dumiso Dabengwa, baphuma kumanyano lo besithi kabaphathwa ngemfanelo nguMugabe labanye bakhe.
Sixoxe loMnu. Believe Gaule, okubandla leZanu PF, othi kumele basebenze gadalala ukuthi umanyano lo usebenzele uzulu.
UMnu. Mathew Sibanda, okubandla leZapu elaphuma kumanyano wamabandla la, uthe sokusele udokoza kuphela phakathi kwebandla lePF Zapu elalikhokhelwa nguNkomo njalo lele Zanu PF likaMugabe.
