Kulabantu abathi akusaqedakali okwenziwa yikhomishini ehlolisisa ukudutshulwa kwabantu ngoNcwabakazi eHarare ekhokhelwa nguMnu. Kgalema Motlanthe, owayengumongameli wakwele South Africa
Bathi abanye abantu baqamba amanga kukhomishini le besenzela ukugcolisa abaphatheka kwezombusazwe.
Inengi labo lithi kababoni ikhomishini le isethula okuhambelana lomsebenzi wabo bengaqeda ukukhuluma lozulu.
Ukuze sihlaziye udaba lolu, sixoxe lengcwethi yezombusazwe ezimele yodwa, uNkosikazi Priscilla Ndlovu, othi kuzaba nzima ukuthi ikhomishini le iphume lezinqumo ezimgceke.
Kusenjalo, ibandla leMovement for Democratic Change elikhokhelwa nguMnu. Nelson Chamisa lithi ibandla leZanu PF kumele livume ukuthi uMongameli Emmerson Mnangagwa kakhethwanga ngemfanelo ukwenzela ukuthi ilizwe lithuthuke kahle.
UMnu. Volta Moyo okubandla leli uthi ilizwe lizaqhubekela phambili nxa ibandla leZanu PF lingakhulumi iqiniso ngokwenzakala kukhetho lonyaka.
Kodwa uMnu. Believe Gaule uthi ibandla leMDC lidlala ngesikhathi.
