Kuhlelo "Woza Friday" liviki inthathelizindaba yeStudio Seven uBenedict Nhlapho usethulela ingxoxo ayenze lomculi womdumo kaMaskandi uThobane Khabazela insizwa edabuka eMaphisa eKezi. UThobane leqembu lakhe le Amacwane Amahle bethule idlalade elitsha elithi "Emaphisa".
UThobane Khabazala uzelwe eBhalagwe, eMaphisa ngo 1990. Ngo 2005 impilo yamthatha yayamuthi qithi koNongoma emzansi Africa, lapho acina esesaziwa njengentshantshu kwezomculo lokugida.
Ngemva kwesikhathi eside ecula lamanye amaqembu, ngo 2014, usungule elakhe elaMacwane Amahle, lona eselikhiphe idlalade elitsha elithi Emaphisa.
UKhabazela uthi ukucula uMaskandi yisipho asithola kugogo wakhe esasemncane. Idlalade lakhe elitsha leli lilengoma ezilitshumi lambili. Kukhona le eyesibili ethi “Mama”, lapho abonga khona unina ngokumondla phansi kwezimo ezinzima.
UKhabazela uthi yena ucula ngakubonayo kanye lakuphuphayo. Uthi isifiso sakhe yikuthi enze iDVD ezakwenza abalandeli beqembu lakhe bangezwa kuphela kodwa baphinde bathole lokudla kwamehlo. Uthi ke konke lokhu kusemandleni abalandeli bakhe njengoba uxhaso lwabo kuyilo olumupha izandla zokufeza la amaphupho.
Kungoma yakhe ethi "EMaphisa" uKhabazela uthi loba esesicwicwiza isiZulu size siphume ngamakhala, akayikhohlwanga imvelaphi yakhe.
