Akubizwa ozwayo kulezinsuku edolobheni lako Bulawayo lapho okuqhutshwa khona umdlalo wetshumi lanye owe Intwasa Arts Festival koBulawayo kulenhlelo zemidlalo eziqhutshelwa endaweni ezitshiyeneyo zakontuthu.
Igceke elokupaka izimota elingaphandle kwe Large City Hall kulapho okutshaya khona amaqembu adlala amakatali njalo ngosuku lokuvulwa kwalimidlalo okusemthethweni ngoLwesithathu iqembu le Bayethe Ensemble kanye lele Afrika Revenge yiwo akholisise uzulu.
NgoLwesine emini bekuleqembu le Inkululeko Yabatsha School of Arts -IYASA, ntambama kutshaye iqembu le Ndolwane Super Sounds kwathi ngemva kwalo abantu bathokoziswe nguJeys Marabini kanye lo Clement Magwaza.
Phakathi laphakathi kokutshaywa kwamakatali uzulu uyabe ekholisiswa ngumahlekisa olodumo eZimbabwe jikelele uBabongile Sikhonjwa.
Abantu babukela zonke lezi inhlelo ezenziwa egcekeni lezimota eliphandle kwe Large City Hall mathupha bengakhokhanga lutho kodwa ngoLwesihlanu abafuna ukubona umculi wengoma ze Zim Dancehall uWinky D yena otshayela phakathi kwayo iLarge City Hall bekuzamele behlukane lamadola amahlanu.
NgoMgqibelo okuyilo usuku lokucina lomdlalo we Intwasa Arts Festival koBulawayo kulenhlelo ezimbili ezingenwa ngemali njalo lezi ngezithi owe Intwasa Fashion Show yona ezaqhutshelwa eBulawayo Theatre njalo ibiza amadola alitshumi kanye leye Intwasa Comedy Show ezaqhutshelwa endaweni ye Hope Centre.
