Uphenyo olusanda kwenziwa yinhlanganiso yeAfrobarometer luveza ukuthi balutshwana abantu kuzwekazi leAfrica abafisa ukuthi kukhululeke imisakazo lamaphephandaba.
Bathi ohulumende kumele banqabele ukwethulwa kwemibiko elakho ukukhuthaza ubudlwangudlwangu lokunye okubi.
Uphenyo lolu olwethulwe ngoLwesithathu olwenziwe emazweni angamatshumu amathathu lane – 34 – kusukela ngomnyaka ka2011, luveza ukuthi abasekela lokhu ngabantu asebekhulile. Lokhu kuvezwe sobala emazweni angamatshumi amabili lanhlanu phakathi kwamazwe angamatshumi amathathu lanye – 31 – okwenziwa khona uphenyo lolu.
Ilizwe leTanzania kulandela eleCape Verde, ele Uganda kanye lele Tunisia kulapho okulabantu abanengi abalombono lo.
Uphenyo lolu luveze njalo ukuthi imisakazo yiyo elalelwa ngabantu abanengi kulandela umabonakude.
IAfrobarometer ithi abantu abanengi abahluphekayo, abangafundanga, asebekhulile, abahlala emaphandleni labesifazana kabenelisi ukusebenzisa konke lokhu okugoqela njalo ubulembu bokuxhumana.
Uphenyo lolu lwethulwe ngesikhathi kulunguselelwa ukunanza usuku lweWorld Press Freedom Day ngoLwesihlanu.
UMnu. Raphael Khumalo, owayengumqondisi weAlpha Media Holdings, uthi kumele kube lemisakazo eminengi ukwenzela ukuthi abantu benelise ukukhetha abakufisayo bengathola izindaba ezitshiyeneyo.
Usuku lweWorld Press Freedom Day luzananzwa ngoLwesihlanu ngaphansi kwesihloko esithi ‘Media for Democracy: Journalism and Elections in Times of Disinformation’.
