Inhlanganiso yeWorld Health Organization (WHO) ithi baqhubekela phambili besebenza lohulumende weZimbabwe ukwenzela ukunqabela ukumemetheka komkhuhlane weCoronavirus osubulele abantu abedlula amakhulu amathathu kwele China.
Omele inhlanganiso le eZimbabwe, uDokotela Alex Gasasira, utshele umsakazo weStudio 7 ngeSonto ukuthi akukabi lomuntu okhanya elomkhuhlane lo elizweni kulabo abavela endaweni ezitshiyeneyo kwele China lamanye amazwe osokuqhamuke umkhuhlane lo ongelaphekiyo.
Kulabantu abafika inkulungwana ezilitshumi lane – 14,000 abalomkhuhlane lo kwele China. Sokulabantu abalawo kwele Philiphines, Russia, United States lamanye amazwe lapho osokuvinjwa abantu abavela kwele China ukuba bangengeni emazweni la.
Ukuze sizwe ukuba abantu bangenzani ekuzivikela ukuthi bengabi lomkhuhlane lo, sixoxe lengcwethi kwezempilalahle, uDokotela Elophi Sibanda, othi kumele abantu bengethuki kakakhulu.
Uthi umkhuhlane lo umemethekiswa yikuthimula, ukukhwehlela lezinye indlela.
UDokotela Sibanda uthi kuqakathekile ukuthi abantu bathimulele emakhwapheni, bageze izandla njalo besule amakhovula ngamaphetshana okwenza lokhu.