ZEC: Uhlelo LweVoter Registration Lokhu Lungakaqalisi

WASHINGTON —  Ikhomishini ebona ngokuqhutshwa kokhetho eye Zimbabwe Electoral Commission ithi isalungisisa okusaseleyo andubana iqalise uhlelo lokubhalisa abafuna ukuvota kukhetho oluzayo olwe 30-day voter registration exercise obelukhangelelwe ukusungulwa ngoMvulo.

Inkokheli zamabandla ezombusazwe zikhangelelwe ukuhlangana le ZEC zicubungula loludaba ngoLwesibili.

UMnu. Thandeko Zinti-Mnkandla olilunga lekhomithi yedale lephalamende eye Justice, Legal Affairs, Constitutional and Parliamentary Affairs, njalo emela iGwanda North edale lephalamende utshele uSithandekile Mhlanga weStudio 7 ukuthi bekufanele i ZEC iqale iphutshise amalungiselelo ayo andubana yazise abalelungelo lokuvota ukuthi beqalise nini ukubhalisa.