Umlamulankunzi kudaba lweZimbabwe uMongameli Jacob Zuma weleSouth Africa uzahlangana lomgcinisihlalo weSadc Troika njalo enguMongameli weleZambia UMnu Rupiah Banda kuliviki behlafuna udaba lweZimbabwe.
UMnu Banda, ukhangelelwe ukuya kweleSouth Africa ngoLwesithathu njalo umhlangano wakhe loZuma ukhangelelwe ukubakhona ngoLwesine.
UZuma ukhangelelwe ukwazisa uBanda ngohambo lwakhe eZimbabwe ngeviki edluleyo lapho ahlangane khona lenkokheli yamabandla akuhulumende womanyano, ethi uMongameli Mugabe, uMnu Morgan Tsvangirai loMnu Arthur Mutambara ngokuhluphayo phakathi kweZanu PF leMDC.
Ubikwa njalo eqonqosele abathathu laba ukuba becande indlela yokhetho ngenjongo yokuqeda ukudonselana okukhona.
Uhambo lukaZuma eHarare luze ngemva kokuba iSadc Troika yehluleke ukuhlafuna udaba lweZimbabwe kweleBotswana kumaviki ababili edluleyo ngesizatho sokuthi uBanda, njengomgcinisihlalo weSadc Troika wehluleke ukuya kulumhlangano.
Umcebisi kaZuma uNkosazana Lindiwe Zulu ufakazele iStudio 7 ukuba ngempela uZuma loBanda bazaludingida udaba lweZimbabwe ngoLwesine.
