Usibalukhulu weReserve Bank uthi umnotho welizwe ubulawa ngabantu kanye lamankampani afihla imali emabhanga akwamanye.
UMnu John Mangudya wethule amazwi la ngoLwesine eHarare, embikweni wakhe ophathelane lokusebenza kwemali, iMonetary Policy.
Uthe nyakenye uzulu ususe imali engange $684 million eZimbabwe eyisa emabhanga akwamanye amazwe, kwathi amankampani wona asusa imali engange$1, 2 billion elizweni.
Lokhu ngokunye okubangela ukuthi umnotho weZimbabwe uqhubeke usadalala, kugcizelele uMangudya.
Ngalokho uthi kumele ilizwe livuselele umthethwandaba okhangelane lokuthonisisa amacala aphathelane lokutshaphazwa kwemali.
Wengeze wathi kuqala nje ngoLwesihlanu, umuntu oyabe efuna ukukhipha imali edlula i$10, 000 ebhanga, kumele azise ibhanga kusalelanga ngaphambilini.
Kodwa ingcwethi kwezenotho uMnu Masimba Kuchera uthe amanyathelo la kasoze aphathise emizameni yokuvuselela umnotho.
