Uzulu weHarare, umanyane labanye ilizwe lonke, ukunanza usuku oluqakathekisa imisebenzi yabakubutho olwe Defence Forces Day, kodwa ekhala ukuba okwalonyaka, kwehlukile nxa kuqathaniswa leminye iminyaka, ngoba bengaqoqelwanga imicimbicimbi yokuzilabazisa evame ukwenziwa ngabezomvikela.
Kutshaywe umpululu kubangwa umsindo wokujabula,lapho umongameli Robert Mugabe engena enkundleni yeNational Sports Stadium ngosuku lwe Defence Forces Day, ezokwethula amazwi akhe.
Ngaphambilini unkosikazi wakhe uGrace Mugabe ungene ekhokhela imhuli yakhe.
Kuqale kwenziwa umkhosi wokuvezwa kwemihlobo yama flag enhlangothi zonke ezibumbe umbutho we Defence Forces i Presentation of colours.
Lolusuku lokunanza abakubutho, lonyaka lunanzwa kulokufuthelana phakathi kwenkokheli yabalwa impi yenkululeko, ekhokhelwa ngumnumzana Christopher Mutsvangwa, yona engazihluphanga ukuzaphatheka njengalokho abakwenze kwelokunanza imisebenzi yabalwa impi yenkululeko lwe Heroes Day ngoMvulo.
Lokhu kufuthelana kuza ngemva kokuba kube lokungezwani phakathi kwabo lomongameli Mugabe, phezu kokuba ngubani okumele athathe intambo zombuso, abalwa impi yenkululeko laba besitsho mgceke ukuba basekela umsekeli kamongameli umnumzana Emmerson Munangagwa. Kwadala ukuhlukunyezwa lokubotshwa kwabanye babo ababalisa isikhulumeli enhlanganisweni eye Zimbabwe National Liberation War Veterans Association – ZNLWVA,umnumzana Douglas Mahiya, unobhala umnumzana Victor Matemadanda, umsekeli womgcinisihlalo umnumzana Headman Moyo, umsekeli womgcinisihlalo esigabeni seHarare, umnumzana Hoyini Samuel Bhila labanye.
Umnumzana Blessed Ronga, omunye wabakade bekulumkhosi uthi akaboni ukufuthelana kuphela phakathi kwabalwa impi ngaphandle kokuba axolise uMugabe ngokuthe kwenzakala.
Lanxa beze ngobunengi abantu emkhosini walamuhla, bebetshengisa ukungawujabuleli kangako owalonyaka, abekade ekulindele ukukukholisa njengenhlalayenza, okubalisa imicimbicimbi efana lendlela abasesibuthweni benza ngayo lapho besempini, ingazange yenziwe.
Abakade bekhona emkhosini lo, bathi okunye okusuke kwanenka uzulu, yikusilela kwezimota lamabhasi avame ukubathwalala besiza emkhosini we Defence Forces Day. Okunye njalo okube ludubo yikuba uzulu ubekhangelele ukuba uzokutholiswa okuya ethunjini njengoba indlala ibhahile nje.
Kuthi abaphila ngokuthengisa, bebeze ngobunengi bezozama ukuqhuba ibhizimusi ehlukeneyo kusukela kwabekade bethengisa isitshwala kanye labonamnede. Labo bebekhala ngekuthi, owalonyaka umkhosi awubatholisanga nzuzo njengeminyakeni.
Umumo womkhathi lawo ubaphazamise kakhulu abathengisa okunathwayo njengoba kuvuke kugubuzele, bungathengwanga kangako loba onamnede.
Unkosazana Tarisai Choto, ophila ngokuthengisa laye, uthi ibhizimusi beliphansi kakhulu lamhlanje. Yena utshele intathelizindaba ukuba belumnandi kuye usuku lwalamuhla lokunanza abakubutho lwe Defence Forces.
Ungenwe yinkokheli yeZanu PF, abasekeli bakamongameli bobabili, umnumzana Phelekezela Mphoko lemhuli yakhe kanye lomnumzana Emmerson Munangagwa, inkokheli yabakubutho, inkokheli kunhlangothi ezehlukeneyo zikahulumende, abamela uhlangothi lwebutho emahofisini abammeli bamazwe ehlukeneyo eZimbabwe, abakubutho lezihlobo zabo kanye lozulu.
Ulibaziswe ngendlela ezehlukeneyo uzulu, okubalisa undlalo wenguqu phakathi kweqembu labakubutho lele Caps United.
Bebekhona abeqembu leMbare Chimurenga Choir njengenhlayenza, belezembatho zeZanu PF, becula lokugiya ezomdabu kanye lomculi olodumo uAleck Macheso leqembu leBand yabebutho.
