Kulezizalwane zeZimbabwe ezithi bekungamelanga uMongameli Robert Mugabe aye emhlanganweni wenhlanganiso yamazwe azimele wodwa eye Non-Aligned Movement Summit owenzelwa eVenezuela.
Abaxoxe leStudio 7 njalo abaphendule imbuzo efakwe ebulenjini beVOA Ndebele leVOA Studio 7, bathe kuyamangalisa ukuthi uMugabe usemhlanganweni lo ilizwe lona libhekane lenhlupho ezimbalwa ezigoqela ukubhidlika komnotho welizwe.
Abanye balabo abazondiswe yilokhu nguMelissa Moyo, Fakazi Maramba, Dumisani Mdladla, Vengai Chipamba, Simelokuhla Ncube labanye abambalwa abathi baleqiniso lokuthi uzatshona ezitshayele amangqetshane emhlanganweni lo.
Bathe lokhu akusoze kuncede ilizwe. Kasenelisanga ukukhulumisana lamalunga ebandla leZanu PF ngalokhu.
Okunye okuzakhulunywa emhlanganweni lo yizijeziso zenotho ezafakelwa amalunga ebandla leZanu PF ngamazwe entshonalanda, ukuncindezelwa kwabantu ePalistine lokunye okutshiyeneyo.
UMugabe ukhangelelwe ukuthi uzathi esuka lapho aye edolobheni New York eMelika lapho okuzabe kulomhlangano oqoqwe yinhlanganiso yamazwe yomhlaba eye United Nations. Umhlangano lo ubizwa ngokuthi yiUnited Nations General Assembly.
Ukuze sihlaziye okwenziwa yiNon-Aligned Movement (NAM) njalo lesimo senhlanganiso le emhlabeni jikelele, iStudio 7 ixoxe loMnu. Dumisani Nkomo, ingcwethi kwezombusazwe ezimele yodwa.
UNkomo uthe inhlanganiso yeNAM kayiselancedo ngakho-ke ekwenzayo akusoze kuncede ilizwe leZimbabwe.
“Esikwaziyo yikuthi iNAM yabunjwa ngesikhathi seCold War iMelika isalwisana leRussia. Okwamanje kayiselancedo emhlabeni jikelele.”
