Inhlanganiso ezizimeleyo seziveze ukuthukuthela phezu kwamazwi ethulwe ngumphathintambo obona ngezemithetho uMnu Patrick Chinamasa okuthi imithetho efana lePosa kanye leAippa ayisoze iguqulwe.
Ekubunjweni kukahulumende womanyano, iZanu PF leMDC avumelana ukuthi imithetho le kuzamele iguqulwe ngoba isephula amalungelo oluntu njalo ivimba iMDC ukuthi yenze imihlangano yayo ngokukhulekileyo.
Kodwa iZanu PF sihlehla nyovana isithi imithetho le mihle kakhulu njalo akumelanga iguqulwe kumbe yesulwe.
Abenhlanganiso ezizimeleyo labalwela ilungelo loluntu bathi ukhetho oluzayo alusoze lube ngolukhululekileyo nxa imithetho yomibili ingaguqulwanga.
