Uzulu uthi liphuzile ibhanga elikhulu lelizwe eleReserve Bank of Zimbabwe ukwethula uhlelo lokufundisa abantu makhaza labosomabhizimisi ngokusetshenziswa kwama bond notes lokuthi azabe ekhangeleka njani.
Abantu makhaza abakhulume leStudio 7 ngoMvulo bathe umbiko owethulwe ngusibalikhulu webhanga leli UMnu. John Mangudya othi bafuna ukufundisa uzulu ngokusebenza kwama bond notes utshengisa ukuthi kabakwazi abekwenzayo.
Iphephandaba leHerald libika ukuthi uMangudya uphinde njalo wathi amabond notes la kawatsho ukuthi sokuzasetshenziswa idollar leZimbabwe elagugudeka laze lacina lilahlwa.
UMnu. Masimba Kuchera, ingcwethi kwezenotho, utshele iStudio 7 ukuthi imfundiso yama bond notes iqakathekile kakhulu ukwenzela ukuthi uzulu engaqilwa ezitaladini lendaweni ezinengo zokuthenga lokuthengisa impahla etshiyeneyo.
“Ngibona engani sebephuzile ukwenza lokhu nxa befuna ukuletha ama bond notes kusikhatshana esizayo. Angazi ukuthi bazaphumelela njani ukufika endaweni ezinengi elizweni.
“… Nxa ukhangele lapha uzabona ukuthi ukufika kwembiko emaphandleni lakwezinye indawo eZimbabwe kunzima kakhulu ngoba abanye abala misakazo yezindaba njalo abanye kababali amaphephandaba.”
Uzulu lokhe etshengisela ezitaladini eZimbabwe ekhonona ngokufakwa kwama bond notes kumnotho welizwe.
