Izakhamizi zemhlubulweni weMaNdebeleni zikhala ezimathonsi ngokuqansa kwentengo yempahla ezitolo osekudale ukuba abantu baphile nzima ngaphansi kwesimo esiselizweni sokulwisana lokumemetheka kweCovid-19.
Inengi labezitolo libikwa lingalandeli iziqondiso zikahulumende zokuthi intengo yempahla kumele ibuyele lapho eyayikhona ngoMbimbitho ngoba isiqanse okwedlulisa amalawulo kungela sizatho.
Emizameni yokumelana lokuqansa kwentengo yempahla ezitholo eZimbabwe umsekeli kamongameli uMnu. Kembo Mohad wethule umlayo kunyenga ezimbili ezedluleyo esithi intengo yakho konke okwaqansayo yehliswe ibuyele kuleyo eyayikhona ngoMbimbitho kusungulwa uhlelo olweLockdown emizameni yokumelana leCovid 19. Kodwa abaninibhizimusi kabasinanzanga lesi siqondiso intengo yempahla ihlala ikhuphuka sikhathi sonke.
UNkosikazi Jane Mlalazi wakoBulawayo, ukhala ngobunzima osobudalwe yilesi simo.
''Kunzima kanganani sihlangene singela esingakufaka emlonyeni, intengo emashop ikhuphukile okumangalisayo, singenzanjani, kuzasifikisa ngaphi, kuphilwa njani boMama lemisebenzi ivaliwe kumele sikhulume esikufunayo njengabomama yithi esadabula isizwe sibhekane lendlala ngalesisikhathi seCovid-19 lockdown”
Osakhulayo wakoBulawayo, uNkosazana Nozipho Moyo laye usole ukuqansa kwentengo emavinkilini okungela simemezelo.
“Indaba yokuthi intengo isikhwela kungabikwa kusithwalisa nzima njengezakhamizi siyabe sibhajethile. Uhulumende sekumele angenele khona vele makungabi lentengo eqansayo iholo lingakhuphulwanga ngoba kusiphilisa nzima.
Isikhulumi sebandla leMDC-Alliance koBulawayo uMnu Swithern Chirowodza laye usole ukukhuphuka kwentengo yempahla mahlayana.
“Itshukela likhuphukile, isepa layo isikhuphukile inengi elithengisa edolobheni sebethengisa ngedola lemelika engaholwa ngabanengi. Impuphu esithengiswa ayiselahlonzi, yimpuohu nje abasemaphandleni uma besenelisa bengasiza izihlobo zabo ezisemadolobheni ngoba isimo asimanga kahle.”
Umcebisi kwezemikhankaso enhlanganisweni yamalungelo abathengi eyeNational Consumer Rights Association, uMnu Effie Ncube uthi kumele uhulumende akhulumisane labamabhizimusi ngodaba lwentengo.
“Indaba yentongo yezinto ezitolo akusiyonto yokuyithwalela iAK lebatton stick uthi azehle izinto ngoba zilabanikazi lezozinto kumle libonisane likhulumisane labo licebisane libonisane lenze ngendlela eyabe iphume ekuxoxisaneni. Wayevele ezakwehluleka uBaba uMohadi ayibamba ngakhona ngoba wayilanda ngemachine gun kanti yindaba yokuhlalela phansi abantu baxoxisane babonisane bavumelane lokho okungasiza isizwe. Ingxoxo ukuxoxisana yikho okulamulayo, iAK, ibatton stick lemachine gun ayisebenzi kuprice control.
Ekupheleni kukaMabasa lonyaka, umsekeli kaMongameli uMnu Kembo Mohadi ongumngcinisihlalo njalo we Inter-Ministerial Taskforce on COVID-19 wethula isiqondiso sokuba zonke izitolo ezikhuphule intengo yemphahla, kaziphange zehlise iye lapho eyayimi khona mhla zingamatshumi amabili lanhlanu ngoMbimbitho lonyaka lapho kusungulwa uhlelo lokuvala ilizwe ngenjongo yokumelana leCovid 19, olweLockdown. Kodwa akula ngitsho loyedwa usomabhizimusi osethe walandela lesisiqondiso.
UMohadi ubengadobhi ucingo lwakhe ngesikhathi sihlolisisa ukuba nyathela bani asebelithethe njengohulumende ngokulandelwa kwesiqondiso sokwehliswa kwentengo yempahla ezitolo njalo lemibuzo esiyithumele enkundleni yeWhatsapp size saya emoyeni elokhu engakayiphenduli.