Kulokukhonona koBulawayo ngemva kokuvinjelwa kwabantwana abavela eMatabeleland ukuthi bangene esikolweni sokufundisa omongikazi.
Abantwana ababili phakathi kwabangamatshumi amane bavela esabelweni seMatebeleland. Abangamatshumi amabili lambili badabuka eMashonaland.
Abantu bahla amalahle ngodaba lolu besithi bayadelelwa yilabo abadinga abantwana bokufundiswa ukuba ngabongi labongikazi.
UMnu. Michael Ndiweni, ungumqondisi weBulawayo Vendors and Trading Association njalo ocubungula ezombusazwe ezimele yedwa, uthi lokhu yikuhlukumeza ilungelo labantu bakoBulawayo ngoba sebesehlukaniswa leminye imihlobo.
“Into eyenzakala empilo yikuhlukumeza ilungelo labantu bakoBulawayo leMatabeleland nxa sikhangelele isikekelo sombuso …”
UMnu. Disire Moyo, umqondisi wenhlanganiso yeVictory Siyanqoba, uthi kulihlazo ukuthi kuqhatshwe abantu bokuza.
‘‘Lokhu okwenzakale eMpilo ukuthi kuqhatshwe abantu bokuza eMatabeleland bevela ngaphandle kwesabelo seMatebeleland ngibona engathi kulihlazo elikhulu kakhulu.”
UMnu. Patron Xaba, olilunga leMthwakazi Republic Party, uthi kufanele kufakwe isikhalazo kuhulumende ukuze kubonakale ukuthi abaphathekanga kahle ngaloludaba.
Kasenelisanga ukukhuluma leziphathamandla zikahulumende ngodaba lolu.