Izakhamuzi zakoBulawayo sezamukele ngenjabulo ukuphathiswa ngabebutho, kuhlelo lokuhlatshwa ijekiseni yokumelana leCoronavirus.
Abe Zimbabwe Defense Forces baqalise ukuncedisa ukuhlaba abantu ijekiseni leCovid 19 Vaccine elokitshini leCowdray Park kanye laseMganwini.
Izakhamizi zithi ukuphathisa kwabebutho kulinyathelo elihle elizakwehlisa indwendwe emakilinika. Kusukela ingoMvulo ibutho leZimbabwe liphatheke kumkhankaso wokuhlaba izakhamuzi zakoBulawayo ngoba kuyiviki yabo yokuncedisa uzulu - iCommunity Assistance Week, phambilini kokuthakazelela usuku lwabo olwe Defence Forces day ngoLweSibili oluzayo.
Abebutho babuye bexhasana labekhansili yakoBulawayo lohulumende ekuhlabeni uzulu ijekiseni epha umzimba amasotsha okumelana le Covid-19.
Umnunzana Future Maphosa isakhamuzi sasemzini weMganwini ngomunye wabancoma kakhulu inyathelo labebutho leli.
“Sibona kuqakathekile ukuthi amasotsha abuye ezohlaba I-Vaccine ngapha duzane lathi. Amaline aba khona ema clinics njalo leziphatho ezikhona ema clinics azithokozisi njalo lama line makhulu kakhulu kucinwa kuhlatshwe abantu abalutshwane. Kuqakathekile ukuthi wonke umuntu elizweni lethu ahlabe kusaselesikhathi ukwenzela ukuthi sivikele umkhuhlane lo kusasemasinyane abantu bengafi. Kuhle nxa emasotsha encedisana lama nurse ukuze silwisane lomkhuhlane lo uze uphele lathi ngapha sizazinceda ngokugqoka ama mask kanye le social distancing.”
Esinye njalo isakhamuzi saseMganwini umnunzana Gift Mlilo uthi abantu kumele babonge ukuthi ibutho liyancedisa bengabi lokwesaba.
“Siyabonga nxa sekuhlaba lama Sotsha, because siyakwazi kule pressure ama nurse asemalutshwane abanye babanjwa i Covid19. Kunjalo ke nxa amaSotsha lawa afundela ukuhlaba, ekwazi ukuziphatha emphakathini kuright because abantu bengabona amaSotsha kwesinye isikhathi basuka besabe kube sekungani yinto ye force matter. So amaSotsha aright azohlaba in a good spirit kungela kwethuselana, kodwa mina ngithi ku right ukuthi bahlabe abantu so long besenza kuhle.”
Umnunzana Greater Sibanda isakhamuzi sakoBulawayo uthi inhlelo ezinje zokusebenzelana labebutho ziqakathekile kakhulu.
“Siyalwamukela kakhulu uhlelo lolu olwenziwe yiZDF ukuthi izohlaba abantu endaweni zethu. Ama outreach lawa aqakathekile kakhulu kumaviki adlulileyo sike sabona abanye njalo lokhu kwenza abantu basukume ngobunengi babo bayehlaba. Luhlelo oluhle lolu esilwamukelayo njenge zakhamizi.”
Imizamo yokuxhumana lesikhulumeli sebutho uColonel Alphios Makotore yehlule ngoba ucingo belungaphendulwa. Kodwa uColonel Ossie Olie Mhandu onguBulawayo District Commander uthi lokhu kungenye indlela ibutho eliphathisa ngayo uzulu ethi njalo iviki yakuqala yenyanga kaNcwabakazi bayibekela ukuphathisa uzulu. Wengeze ethi amaqula abo aphathisa uzulu uluhlatshwa amajekiseni elokitshini leCowdray Park le Emganwini.
Kusiyaphela usuku lwayizolo i Zimbabwe Defense Forces ibihlabe abantu abangamatshumi amane lasitshiyagalombili (48) ijekiseni yokuqala eye Sinovac elokitshini le Cowdray Park. Kuthi eMganwini kuhlatshwe abantu abangamatshumi ayisitshiyagalolunye lanye (91) ijekiseni yokuqala eye Sinovac kanye loyedwa umuntu obehlaba eyesibili okuletha inani labantu bonke abahlwatshwe libutho babe likhulu lamatshumi amane (140).