Umphathintambo wezemithetho uMnu Ziyambi Ziyambi ngoMvulo ukhweze amaphepha emthethwandaba weSupreme Court ephikisa isinqumo sokususa uMnu Luke Malaba esikhundleni sikamahluli omkhulu welizwe uChief Justice.
Idale leHigh Court yilo elinqume ngoMgqibelo ukuthi inyathelo likaMongameli Emmerson Mnangagwa lokwengezwa isikhathi sokusebenza kukaMalaba ngeminyaka emihlanu kwephula isisekelo sombuso welizwe.
Abahluli balumthethwaba bathe ngokunjalo, uMalaba sekumpentsheni ngoba isikhathi sakhe sokusebenza siphele ngoMgqibelo lapho afikise khona iminyaka yokuzalwa engamatshumi ayisikhombisa, 70, okuyiyo iminyaka abahluli abamele batshiye ngayo umsebenzi.
Ngakolunye uhlangothi, amagqwetha enhlanganiso yeZimbabwe Human Rights NGO Forum, engenye yenhlanganiso ezikhweze udaba lolu emthethwandaba, selobele iHigh Court leJudicial Service Commission (JSC) incwadi esithi uMnu Ziyambi kumele abotshelwe icala lokweyisa umthethwandaba ngemva kokusola abahluli abasuse uMalaba esihlalweni esithi basetshenziswa yizitha.
Kusenjalo, ibandla leMDC Alliance selisole amazwi kaZiyambi lisithi akwenzileyo yikwethusela abahluleli bemithethwandaba ukuze basebenze beyamele kuhlangothi lweZanu PF.
Umsekeli wesikhulumeli salelibandla Umnu Felix Magalela Mafa Sibanda lithi umthethwandaba weHigh Court wenze kuhle kakhulu ngesinqumo sawo.
Kodwa ilunga leZanu PF uMnu Believe Gaule utshele iStudio 7 ukuthi uZiyambi ubeveza nje imbono yakhe hatshi ukwethusela imithethwandaba.