Sekuqhamuke inkulumo phezu kohambo lukamongameli Robert Mugabe kwele India embukisweni wezamasiko lapho azithole enguye yedwa umongameli wasuka umbuthano ungakaqali.
Abanye ngabakade besola loluhambo lapho umongameli esuka besithi yikucitha imali mahlayana ebingasetshenziswa ukuphathisa uzulu olambayo.
Okucunule abanye yikuthi umugabe ubengahamabanga labaphathintambo ababona ngezamasiko ababalisa uMnu. Makhosini Hlongwane loMnu. Abednico Ncube.
Amanye amazwe abikwa ethumele abake baba ngomongeli bamazwe abo kungela ngitsho umongameli loyedwa.
Izolo isikhulumeli sikamongameli Mugabe, uMnu. George Charamaba, laye ohambe loMugabe, utshele umsakazo weZBC ukuthi uMugabe usezaphenduka ekhaya ngoba umumo wezomvikela ungahlelwanga kakahle.
Ukuhlaziyo loludaba uChris Gande weStudio Seven uxoxe lengcwethi ecubungula ezombusazwe, uMnu. Nhlanhla Dube othi okwenzekelayo kutshengisa ukuthi zikhona iziphathamandla zikamongameli ezifuna ukumyangisa.
“Akungeke kwenzakala ukuthi uMongameli welizwe askue aze ayefika eIndia konke okumele kulungiswe kungalungiswanga. Siyakwazi amalungiselelo ohambo lukamongameli ngesilungu okuthiwa yiprotocol konke lokhu bengakukhangelanga bakucubungula lo ambassador okumele akhengele leyo ndawo wakhengela ukuthi konke kwenzwe ngendlela efaneleyo,” kutsho uDube.
UDube uthi okwenzakeleyo kufana xathu lalokho okwenzakala uMongameli aze abale ispeech esakudala lokwenzakala eNigeria lapho uMongameli aze ahlukuluzwe ngenye intathelizindaba.
“Okukutshengiselayo yikuthi uMongameli usezihambela nje eyize. Labo abamele bamkhangele abasamnakekeli. Mhlawumbe badinga ukuthi ayengeke aze abonakale ukuthi senqunu phakathi komhlaba wonke,” kutsho uDube.
