UMnu. Morgan Tsvangirai loMnu. Welshman Ncube sebelobelane isivumelwano sokusebenza ndawonye kukhetho oluzakwenziwa ngomnyaka ozayo eZimbabwe.
UTsvangirai uthe lokhu bakwenzele ukuthi kuhlengwe izizalwane zeZimbabwe esezidubeke okumangalisayo ngombuso webalandla leZanu PF.
UTsvangirai uthe bakunanzelele ukuthi uzulu ufuna ukuthi babambane ukwenzela ukususa ibandla leZanu PF embusweni kukhetho oluzakwenziwa ngomnyaka ozayo.
Uphinde wathi sebebonile amaphutha abo okuya kukhetho bengama bandla azimele wodwa.
“Lamuhla siqhubekela phambili ngohambo lwethu esiluqalise izolo loDr. Joice Mujuru … Lolu luhambo lokuthi kubelozibuse kwele Zimbabwe ngaphansi kukahulumende okhululekileyo.
“… Ngiyabe ngiphambanisa nxa ngingasoze ngikhulume ukuthi uhambo lwethu lolu saqalisa loProfessor Ncube ngomnyaka ka 1997 size sibumbe iNational Constitutional Assembly. Lokhu sasikwenzela ukuthi kube lozibuse ogcweleyo eZimbabwe ngokusebenzisa isisekelo sombuso welizwe eziphakeme.
“Kusenjalo kuyamele ngikhulume njalo ukuthi sikesaphambanisa kakhulu kodwa konke lokhu sesikubonile ukuthi akusihambisi ndawo. Abanye baphuma kubandla leMDC ngomnyaka ka2005 okwenza ukuthi kungabizibuse ogcweleyo kwele Zimbabwe. Njengenkokheli kazulu sesibonile ukuthi saphambanisa kakhulu.”
Uphinde wathi kungeke kwenzakala futhi ukuthi bayengena kukhetho bengamabandla atshiyeneyo.
“Nxa kulomuntu ocabanga ukuthi singangena kukhetho simaqamuqamu sinqobe kuyabe kuyibulema obungela nkawulo lobo njalo yikuhlanya kodwa-ke phakathi kwethu lapha akula ohlanyayo. Ngenza konke lokhu njengalokho okwakufunwa nguGibson Sibanda owayevele ekhala ngokuthi kumele simanyane.”
Uthe uzaqhubekela phambili elungisa konke okuhluphayo ukwenzela ukuthi amabandla aphikisa eleZanu PF anqoba kukhetho oluzayo.
Uthe benganqoba kuzaba lozibuse eZimbabwe lapho uhulumende azazama ngamandla wonke ukuthi alungiselele uzulu imisebenzi.
