Izizalwane zeZimbabwe ezihlala eMelika zithi kuyamangalisa ukuthi uMnu. Donald Trump, omele ibandla lama Republicans kukhetho lokumongameli omutsha weMelika, ulakho ukungemukeli impumela yokhetho oluzakwenziwa ngoLwezi.
Abakhulume leStudio 7 bathe okukhulunywe nguTrump kungxoxo mpikiswano ayenze izolo loNkosikazi Hillary Clinton eNevada yokukhetha umongameli, kubakhumbuza ekhaya lapho okujayele ukwenziwa khona ukhetho lukamongameli olungabalulekanga.
UClinton unqobe uTrump kungxoxo mpikiswano le lapho uTrump aphinde wakhonona khona ngendlela okuqhutshwa ngayo ukhetho eMelika esithi luyaphekwa ngasese.
Ukuze sihlaziye udaba lolu iStudio 7 ixoxe loNkosikazi Thalenta Ncube, isizalwane seZimbabwe esihlala eDallas, Texas, esilandela kakhulu ezombangazwe eMelika.
UMaNcube uthe, “UTrump uyadlala. UClinton ubekhanya sibili ukuthi uziphethe njengomuntu ongathi lani elimele laphana lizigqaje ngaye. UTrump okwakhe akwenzayo kukhanya kukhona akuthengisayo ngoba akusiye muntu ozimisele ukuthi abengumphathi welizwe.”
Uthe inkulumo yakhe yokungavezi azakwenza ngempumela yokhetho, uMaNcube uthe, “Vele lokhe waqalisa inkulumo yakhe uyabe engikhumbuza iZimbabwe ngithi ngiyamkhangela ngimbone ephakamisa inqindi yakhe engikhumbuza uRobathi (President Robert Mugabe).
Ukhetho lukamongameli eZimbabwe lujayele ukubalenkulumo emangalisayo abanye besithi luyaphekwa ngasese.
