Kulesizalwane sakwele Zimbabwe, uMnu. Tafadzwa Manyika, othi usexotshisa amalunga ebandla leZanu PF angamatshumi ayisikhombisa – 70 edale lephalamende.
Amalunga la agoqela uMnu. Tongai Mnangagwa, umntaka Mongameli Emmerson Mnangagwa, abaphathintambo bakahulumende abanjengo Nkosikazi Sithembiso Nyoni labanye.
UManyika utshele iStudio 7 ukuthi ungumsekeli kanobhala jikelele webandla leZanu PF ngakho-ke ulamandla okuxotshisa amalunga edale lephalamende angasalandeli iziqondiso zebandla leli.
Uthi usehambise incwadi elamagama alabo abaxotshiswayo kusomlomo wedale lephalamende uMnu. Jacob Mudenda, esingenelisanga ukukhuluma laye ngoba ubengaphenduli umakhalekhukhwini.
Okhokhela ibandla leZanu PF edale lephalamende uTogarepi Pupurai uthi kabamazi uManyika. UPupurai uthi wehlulekile namuhla ukuthola incwadi kaManyika edale lephalamende.
Umabhalane omkhulu wedale lephalamende uMnu. Kennedy Chokuda ubengaphenduli umakhalekhukhwini ngesikhathi edingwa yiStudio 7 ukwenzela ukuba achaze kabanzi ngodaba luka Manyika.
Kusanda kuxotshiswa amalunga edale lephalamende lamakhansila ebandla leCitizens Coalition for Change nguMnu. Sengezo Tshabangu othi ungunobhala jikelele webandla leli. Bayamphika abakubandla leCCC.
Ukuhlaziya loludaba, SIxoxe loMnu. Joseph Tshuma, okudale leZANU PF Central Committee, othi uManyika wenza okusekhanda lakhe ngoba ibandla leli lilabantu abalezikhundla ezihambelana lokwenzakala ephalamende lokunye.
UMnu. Promise Mkwananzi, isikhulumeli sebandla leCCC, uthi bamelele ukubona ukuba uMudenda uzkwenzanjani ngodaba lolu.
Forum